التخلف بعينيه.. واش بنيتة صغيرة يتفرض عليها النقاب صحا.. طفلة فشفشاون منعوها من دخول المدرسة حيت مغطيين ليها وجها.. والدواعش خارجين يدافعو على اغتصاب الطفولة بالنقاب والشراوط

الدواعش بحال العادة فين ما تكون شي حاجة كتمس بحق الطفل، وخصوصا إلى كانت بنت، كتلقاهم هوما اللوالا خاشيين كرموصتهم فيها صحا باش يزيدو يعززو قيم احتقار الطفولة باسم الإسلام والدين، تماما كيف كيحتقرو النساء والأقليات والمختلفين، وهذشي ديما فإطار مشروع دعششة المجتمع والرجوع بيه للعصور الجاهلية، حتى يضربو لمو تالافة كثر مللي هي ضارباه !!
شي مواقع تابعة للخوانجية، وشي جيوش ديال المتخلفين فمواقع التواصل الاجتماعي، وخصوصا ف"فيسبوك" اللي ولاو مقابلينو دابا غير هو وعاصرين عليه بلا خدمة بلا ردمة، خارجين قاليك يحتجو، علاش واحد المدرسة فشفشاون خرجات بنية صغيرة فعمرها 12 لعام بدعوى أنها لابسة النقاب، وحتى حاجة فوجها مكتبان، ودافعو باستماتة على "حق" الطفلة فلباس هذ العجب.
هذ الناس واقيلا ماعارفينش، أو دايرين راسهم ماعارفينش، أن الحق الحقيقي والمهم فتكوين شخصيتها، واللي خاص هذ الطفلة تتمتع بيه بحالها بحال جميع الأطفال والقاصرين على حد سواء، هو تتمتع بحريتها، وتكون طفلة عادية وطبيعية بحالها بحال جميع قراناتها، وتلعب معاهم وتنسجم معاهم بلا اغلال او قيود او شراوط.
حاجة خرى هي أن هذ اللباس اللي باغيين يغطيو بيه المرا باش يسيطرو عليها ويتحكمو فيها ويديروها تحت السباط، راه فالأصل مديور للكبارات، على اعتبار، وكيف كيقولو هوما، أنهم مغريات وعورة وخاص يتغطاو باش ما يفتنوش الرجال، وواخا هذ الطرح متخلف وغير منطقي والمراد منو هو نزع حرية المرا حنا غانمشيو معاه، وبالتالي: فين كاين هذ الإثارة والعورة فجسد طفلة صغيرة مازال باغة تلعب؟ وإلى بان ليه فري هذشي، فأكيد هذ المراض بيدوفيليين، وكيشوفو البنات الصغارات بنظرة جنسية، وهذا مشكل ومعضلة أكبر بكثير...
من جهة ثانية، راه دخول الأطفال بوجه مكشوف للمدرسة خاصو يكون إلزامي، لعدة اعتبارات، باش يكونو معروفين عند أساذتهم، ويسهال عليهم هكذا يقيدو شكون حاضر وشكون غايب، وباش مايجيوش اطفال غرباء للمدرسة مكان اطفال خرين، وتوقع فوضى كبيرة ممكن تضيع حق الاطفال فالتعلم.
وهذشي ماشي غريب على الخوانجية، بحيث شفنا هذشي ديال احتقال الطفولة مزيان فحالة اغتصاب فقيه الجامع لبنات قاصرات، وكيفاش ردوهوم كذابات وبرؤوه هو وخا عتارف بكَاع داكشي اللي منسوب لبه، ودابا عاوتاني خارجين، نفس العناصر تقريبا، يشجعو على اغتصاب آخر للطفولة بهذ الطريقة.