من نهار كتب غلام أبو النعيم داك التهديد والتحريض وأنا كنحس بلي مصيري غادي يكون بحال جار الله عمر لأن الإرهاب قبل مايكون جريمة بشعة راه كيكون غي كاسيطة ديال شيخ أو سيدي أو كتيب ديني أو ستاتو أو لايف في فايسبوك فيه تكفير وتحريض واضح والدولة شافتو وميكات

ضحية الإرهاب المستقبلي محمد سقراط-كود///
من نهار كتب غلام أبو النعيم داك التهديد والتحريض ضدي ماقدرتش نخرج من الدار لأنه تكفير وتهديد واضح بالقتل، وحاليا كنحس براسي بحال نجيب محفوظ وفرج فودة وجار الله عمر ومهدي عامل، كنبغي نخرج كنلقى راسي كنفكر غير في داك المتشدد لي غادي يأثر فيه تحريض غلام أبو النعيم ويستهدفني بشي جنوية، وللأسف يقدر يكون شي صديق الطفولة ديالي أو شي واحد من عائلتي بحكم أنني تربيت في أسرة متدينة والأم ديالي منقبة واصدقاء الطفولة راه شي مات في العراق وسوريا شي داير كروسة ديال خودنجال، إخوة الأمس ولاو يقدرو يغتالوني اليوم بسبب تحريض من غلام أمرد فشل مرتين الأولى في إنباث لحية والتانية في أن يصير شيخا، فصار مؤثرا فايسبوكيا سلفيا مالحقش معاهم حتى لحية علي بلحاج ولكنه لحق ملايين المتتبعين لي ولاو كيحسسوه أنه محصن ضد الدولة والعدالة والحق، وأنه من حقه يكفر وينعث أي واحد بالإلحاد فوقاش بغا بلا مايتعاقب.
الى كانت الدولة قادرة أنها تحضيني وتعتاقلني من وسط سيبير في 2007 لأنه شتابهو في انني إرهابي بسباب اللحية وكان خاص نهار ديال التحقيق مع المخابرات عاد باش طلقوني، فعلى الأقل خاصهم يكونوا قادرين أنهم يحميوني من الغلام لي كفرني وتاهمني بالإلحاد وكيوصي الأتباع ديالو يعقلو عليا باش نهار تجي نوبتي مايزكلونيش، كأنه حاط لائحة فيها مجموعة ديال الناس وكيتسنى غير الإشارة أو الظروف المناسبة باش يبدى يطبق فيهم شرع الله، وكيدعي أنه حتى الموت لي يخلعوه بيها مكيخافش منها وأنه رابح وهو حي والى مات راه رابح الشهادة لي كيخافو منها دعاة العلمانية.
علاش خلعني هاد التهديد واخا راه جاي غير من غلام أمرد، حيت أنا براسي كنت متشدد ومأثر بدوك الأفكار وكنت نقدر نتعدى جسديا على أي واحد الى عرفتو ملحد حيت بالنسبة ليا التعدي عليه راه فيه الآجر والحسنات وقتله كيطلع للجنة مباشرة حتى تلاقيت مرتي وعرفت بلي الجنة يمكن تكون هنا وحسن من هاديك لي كان كيعاود لينا عليها الشيخ كشك، وأنا براسي درت حاجات لي كنخجل منهم حاليا بسباب أنني كنت مبنج ومكلخ بدوك الأفكار، عليها خايف دابا وبزاف لأنه الشباب بحالي كثار لي قادرين يأثر عليهم بحال هاد الغلام ويتبعوه ويمكن يغتالني شي واحد فيهم نصرة لإعلاء كلمة الحق لي عرفتها أنا قبل منو، هاعلاش خاص تدخل الدولة وتحميني كيما كانت كتدخل باش تحمي الناس مني فاش كانو عندي أفكار كيشكلو خطر، الإرهاب قبل مايكون جريمة بشعة راه كيكون غي كاسيطة ديال شيخ أو سيدي أو كتيب ديني أو ستاتو أو لايف في فايسبوك فيه تكفير وتحريض واضح والدولة شافتو وميكات.