الانتقائية فالتضامن. نقابة الصحافة كدير السياسة وعينها فالدولة.. فاش يكون الصحافي ضحية إرهاب المتطرفين ترفض التضامن وفاش يكون ضحية اعتداء القوات العمومية تدين الدولة

إيوا هذا هو الكيل بمكيالين والانتقائية فالتضامن، النقابة الوطنية للصحافة ماتسوقاتش كَاع فاش هاجم مول الفوقية صحافيي "كود" وكفرهم ووصفهم بأبشع الأوصاف، لكن اليوم خارجة فبلاغ كتدين فيه اعتداء القوات العمومية على الصحافيين.
فبلاغها اليوم، قالت النقابة أنها متابعة هذشي دالاعتداءات على الصحافيين بسبب مزاولة عملهم من طرف عناصر القوات العمومية، من انتزاع ميكرو صحافي فمظاهرة المتعاقدين، حتى للاعتداء جسديا على صحافيين لبارح الاحد، واحد فمباراة الديربي بين الرجا والويداد، ولاخر فدار بوعزة.
وكيبان من خلال هذ البلاغ ان النقابة كتدير السياسة، وحاطة عينيها فالدولة والمخزن والقوات العمومية، فالوقت اللي دارت عين ميكا على تكفير طاقم "كود" من طرف مول الفوقية، اللي كيهدد السلامة الجسدية ديال العاملين بها، خصوصا وأن المعني استغل العدد الكبير اللي عندو دالمتابعين باش يقوم بالتحريض ضدها.