"كود" جابت آخر وصية للحمداوية قبل ما تموت

كشف شفيق، الحفيد ديال الحاجة الحمداوية، مباشرة بعد خروجو من المقبرة بعد الدفن ديالها، أن الجدة ديالو خلات آخر وصية ليها قبل الموت.
وقال شفيق، فتصريحو ل"كود" من امام مقبرة الشهداء فكازا، أنها وصات افراد العائلة ديالها باش يتقدمو بالشكر الجزيل والعرفان للملك محمد السادس، اللي اعتنى بيها، وتكلف بمصاريف علاجها فسبيطار الشيخ زايد فالرباط، طيلة الفترة اللي كَلسات فيه.
وزاد شفيق أن الحمداوية كتشكل كذلك عائلة عويطة، فشخص كل من الفنانة الشابة كَزينة عويطة والام ديالها، "الله يجازيهم بالخير وقفو معانا فالفرح والقرح".
وكشف حفيد الحمداوية ان تيليفون جاهم من إدارة الشيخ زايد مع 3 الصباح، بحيث خبروهم بالوفاة ديال الفنانة اللي صدمهم، من بعد ما دخلات الإنعاش هذي شي ثلث أيام.
وقال شفيق أن دخولها الإنعاش كان باقتراح من الطبيبة ديالها اللي كشفات أنه كان احتمالين، تتحسن حالتها وتولي مزيانة او تموت.
واليوم بعد الظهر تم دفن ايقونة العيطة المغربية الحاجة الحمداوية، بحضور افراد عائلتها ومحبيها، وبإجراءات امنية صارمة ومشددة بسبب الظرفية الوبائية.
وشهدات الجنازة حضور غياب الفنانين، باستثناء قلة قليلة من اللي خدمو معاها، بحال الإخوة المرنيسي وولاد البوعزاوي.