هادي لهادوك المتخلفين للي كيجيبو من بلدان عامرة "كورونا" ويحتجو فمطار محمد الخامس: ما بغاوش يدخلونا وما نبقاوش نجيو. استراليا منعات مواطنينها للي ساكنين فالهند يدخلو واللي دخل يضربوه 5 سنين حبس مع 66 الف دولار

باش المغرب كان دار قرار يمنع دخول مواطنين من اوربا للبلاد باش يحمي راسو من سلالات خايبة من كورونا٬ ناضو بعضهم ولى كيمشي لتونس ومنها يجي فطيارة. طبعا فقرار المنع فيه كاع اللي ساكنين فاوربا. وباش حبسوهم فمطار محمد الخامس وقالو ليهم خاصكم تبقاو جوج سيمانات فالعزل٬ ناضو شي وحدين كيحتجو وكيغوتو ودارو فيديوات كتهددو باللي ما يبقاوش يرجعو للبلاد. الما والشطابة. لبلاد واقفة على بحالكم. غير قودو.
اليوم استراليا تعاملات بصرامة خاص المغرب يستافد منها. وزارة الصحة الاسترالية قالت بانو بسباب نسبة المصابين فالهند بكونونا اللي كيدخلو لاستراليا وكيخضعو للحجر٫ فقد تقرر حظر كاع الرحلات القادمة من الهند. ماشي غير هاد الشي. اي مواطن استرالي من هادوك 9 الاف اللي عايشين فالهند٬ رفض القرار وتحايل عليه ودخل٬ كتسناه 5 سنين ويخلص لفلوس كثيرة كتوصل ل66 الف دولار.
هادي ما عمرها كانت فاستراليا. ما عمرها منعات مواطنيها يرجعو لبلادهم ولكن مع الخوف من كورونا٬ ممنوع شي حد يرجع.
الحكومة قالت بوضوح "راه ما كنلعبوش. راه قرار غادي يطبق"
استراليا بحالنا عندها حالات قليلة وخايفة من هاد السلالات ديال كورونا