وحنا حتى يفيقو مسؤولينا من گلبة البغرير والحلوى ويرجعو من مراكش. ايطاليا واليونان فتحو رسميا اوطيلاتهم ومطاراتهم لاستقبال السياح فالعالم واللي بغى يدخل مرحبا والمغرب فعطلة العيد ما هامهم لا مستقبل السياحة لا ديال لارام

فاوربا لمضاربة على السياحة. دول كيجيوها الملايين دالسياح فالعام بحال ايطاليا =60 مليون سائح ف2019 واليونان 22 مليون سائح سنويا كتسابق على فتح اوطيلاتها لاستقبال سياح العالم. اليوم السبت 15 ماي 2021 رسميا فتحات كل من اليونان وايطاليا رسميا مدنها السياحة وطبعا معاها فنادقها واشهر امكانها السياحية. اليوم تحركات هاد البلدان باش ترجع الحياة فقطاع مهم كبير بحال السياحة اللي كيمثل مثلا فاسبانيا 11 بالمائة من اقتصاد المملكة وهاد الرقم كيوصل حتى ل18 بالمائة فدولة مثل اليونان.
ايطاليا واليونان بدات حملتها باش تجيب بشكل اساسي السياح الاوربيين. ما داروش تعقيدات للي بغى يدخل. فتحو ودارو اللي كيديروه كاع الدول. اما تيست "بي سي ار" ف72 ساعة الاخيرة او تيست اونتيكور او شهادة باللي درتي الڤاكسان. سهلو الامور. دول بحال مالطا مشات بعيد فجلب السياح وعطات كادوات عبارة عن بونات فيها حتى 120 اورو للي ديزيرڤا فاللول.
دول كتسابق باش تجلب السياح. كضارب. فرانسا غادية ترفع عدد من الاجراءات اللي كانت اتخدتها باش توقف الفيروس. لاربعا الجاية غاديين يرجعو سكانها للقهاوي والمطاعم ويتحركو بلا قيود.
فاسبانيا هذا اول نهاية اسبوع بلا حالة الطوارئ. هاد الشي خلى اقبال كبير علي المدن السياحية. كاين شي فنادق فمنطقة ڤالينسا كاين اقبال كبير. 70 بالمائة من الفنادق والاقامات السياحية المفتوحة تحجزات اليوم وغدا. فكوسطا ديل سول النسبة وصلات ل50 بالمائة.
وفين حنا فهاد الشي؟ معيدين وكندورو فمراكش وكناكلو الحلوى وفعطلة. شوفو الغباء. القطاع السياحي ما مسوق ليه حد. المكتب الوطني للسياحة خرج شي اجراءات باش تدخل المغرب كلها تخربيق. لحد الان ما كاينش تكذيب لهاديك الاجراءات.
بهاد التصرفات حتى حد ما يجي عندك. اش عندك فايق اليونان ومالطا وتركيا وتونس واسبانيا وايطاليا باش دير شروط تعجيزية باش تجيب السياح.
باش تسالي العطلة دالعيد اللي طوالت غادية تكون دول ربحات ملايين السياح والماكينة بدات كدور. دابا حتى السيمانا الجاية او بعدها عاد نفيقو من گلبة البغرير ولمسمن والحلوى. غادية تكون "لارام" وجدات لائحة اخرى باش تجري على بيلوطات ومستخدمين اخرين باش ما تغرقش كثر من ما هي غارقة. غاديين يسدو اوطيلات ودير شركات كتخدم فالقطاع فاييت.
عندنا وضعية وبائية مزيانة دابا. غير عندنا مسؤولين اغبياء ما عندهم الغيرة بزاف على لبلاد. هاد الشي كيعطل اجراءات كان ممكن نعلنو عليها هادي اسبوع باش كلشي يوجد.