بمليون و240 ألف درهم وهذا غير الثمن اللول.. لوحة "فالمغرب" للفنان الإيرلندي لافيري معروضة للمزاد

ف30 من هذ الشهر، غيتم عرض لوحة "In Morocco" للفنان الإيرلندي، سير جون لافيري، من طرف دار بونهامز للمزادات الفنية البريطانية والإيرلندية الحديثة فلندن.
وغتعرض اللوحة للمزاد بثمن مبدئي كيتقدر بين 100 الف حتى ل150 ألف جنيه إسترليني، أي بين مليون و240 ألف حتى لمليون و860 ألف درهم.
هذ اللوحة عاود اكتشفها ماثيو برادبري، مدير قسم الفن البريطاني والإيرلندي، واعتبر أن هذشي "حدث كبير"، وقال أن اللوحة كانت مع كوليكسيون من أعمال مختلفة، كانت تباعت فالثلاثينات.
واللوحة، المرسومة على القماش، كتعرض منظر طبيعي لأشجار ملونة، كَالسين تحت منها 3 أشخاص كيتناقشو، قريب من بنايات عندها تصميم بحال ديال الأضرحة. و"كيبان وجه الاشخاص الثلاثة مامعروفش مزيان، لكن يقدرو يكونو الإيرل والكونتيسا ديال بيمبروك، (العاصمة السابقة لبلد ويلز التابع للمملكة المتحدة) مع بنتهم باتريسيا هيربرت، اللي زارو لافيري فنفس الفترة فاش كان فالمغرب"، كيزيد برادبري.
وكان جا الرسام الإرلندي للمغرب عام 1891 لمدينة طنجة، وستقر فيها لمدة، وفهذ الفترة فين قرر يرسم هذ اللوحة، تحديدا فبداية عام 1920.
https://www.newsletter.co.uk/heritage-and-retro/heritage/newly-discovered-sir-john-lavery-masterpiece-up-for-auction-3273143