حركة حماس المصنفة كمنظمة ارهابية عند الغرب٬ فاش جا القيادي ديالها اسماعيل هنية للمغرب بدعوة من حزب العدالة والتنمية، تلاقات بناسها بالاضافة الى بعض الاحزاب السياسية الممثلة فالبرلمان٬ ما تلاقاتش لا مع العدل والاحسان ولا النهج الديمقراطي ولا صحاب الجمعية المغربية لحقوق الانسان. ما تلاقاتش مع صحاب الممانعة اللي رافضين التطبيع بقوة ودارو مسيرات احتجاجية ووقفات وديما كيغوتو "حماس"٬ متلاقاهمش هنية. هاد حماس اللي خدامة بالبراغماتية السياسية كثر من المبادئ، هاد الحركة السنية مدعومة من ايران الشيعية وكتزور دول ضد المد الايراني، فحال المغرب. النفاق السياسي لحركة حماس بان فزيارتهم للمغرب، خصوصا انهم تلاقاو رئيس الحكومة اللي وقع اتفاقية التطبيع. يعني حماس تلاقات المطبعين. من الاحزاب اللي تلاقات حماس، حزب الاستقلال، التقدم و الاشتراكية ، الأصالة والمعاصرة. حماس تلاقات احزاب معروف انه خطها العام مع الدولة، واستثنت المعارضين والعدل والاحسان. فهاد الزيارة، ربح فيها البي جي دي كثر، وخسرات فيها العدل والاحسان. الزيارة فحال هادي ميمكنش تكون الا بموافقة الدولة. يعني كادو عطاتو الدولة للبي جي دي. فوق هاد الشي هنية شكر الملك والقصر كبر فيه. غير هاد الشي خلاه ينسى المبادئ اللي ديما هازها: واش هادي واقعية ولا نفاق سياسي؟ كل واحد منكم يقدر يكون عندو رأي
