قرار منع الداخلية لمسيرة فلسطين ورط البي جي دي ورئيسهم اللي وقع اتفاق التطبيع: واش فراس رئيس الحكومة وموافق عليه وواش يقدرو ينزلو للتيران ويتحداو الدولة؟

البي جي دي مع الامين العام الحالي سعد الدين العثماني كيف ديما حزب مكيقدرش يدخل فمواجهة مباشرة مع الدولة عكس سلفه السابق عبد الاله بنكيران اللي كانت عندو الجرأة يقول للدولة "اللا" ف عدد من الملفات والقضايا.
اليوم درس جديد لحزب رئيس الحكومة، بعدما قررت الداخلية منع المسيرة اللي غاتكون يوم الاحد المقبل واللي البي جي دي كيدعم المشاركة فيها. واش ثاني غايدير بلاغ ويقول بانه مغاديش يشارك حيث كاين المنع كما دار ف واقفة سابقة قبل رمضان، وخلا صحاب اليسار والعدل والاحسان يتواجهو مع السلطات.
واش هاد الحزب قادر ينزل للميدان واخا كاين المنع، طبعا صعيب شويا.
البي جي دي كيحني ديما العاصفة، دار خطوة تصعيدية فالبرلمان بالمطالبة باغلاق مكتب الاتصال الاسرائيلي، واخا عارف بلي رئيسهم هو اللي وقع اتفاق مع اسرائيل على اساسو تم استئناف العلاقات اللي كانت سرية ودبا ولات علنية.
بيان الامانة للبي جي دي اليوم فيه دعوة صريحة لاعضاء حزبه والمواطنين لمواصلة الإسهام بفعالية في "إنجاح كل مبادرات الدعم والنصرة لكفاح الشعب الفلسطيني لصموده الأسطوري". وطبعا عارفا مبادرة المسيرة الوطنية يوم الاحد.
هادشي لي واقع البي جي دي كاتستفد منو جماعة العدل والاحسان، اللي كتروج لراسها انها الوحيدة للي كتقاوم التطبيع وكترفض دير مبادرات مع البي جي دي، بل حسن بناجح القيادي فالجماعة لقا الفرصة باش يقطر الشمع على هاد الحزب وقال :"صافي .. انتهت سبعيام ديال استهلاك الوهم وبيعه، ومحاولة درء جريمة التطبيع التي تشجع الكيان الغاصب على ارتكاب جرائم حرب ضد الفلسطينيين.
ما الذي نصدقه؛ هل دعوة الجميع للتنديد أم منع التنديد؟".
العثماني كان دعا الجميع للتنديد قبل يومين، ودبا خرج بلاغ الداخلية فيها منع المسيرة. طبعا الداخلية تابعا ليه. اكيد القرار فراسو وموافق عليه، ويلا مفراسوش فضيحة.