استقالة جماعية جديدة ف البيجيدي لأعضاء بارزين منهم رئيس بلدية بآسفي

البي جي دي مهلوك تنظيميا، كياكل راسو براسو، استقالات كثيرة شفناها مؤخرا، روينة نايضا فالمدن الكبرى وحتى المتوسطة والصغرى، واخرها اسفي المدينة اللي كيسيرها البي جي دي وعندو فيها برلمانيين، بحيث هاد المرة الاستقالات كانت جماعية لاعضاء بارزين.
مصادر داخل البي جي دي قالت في حديث مع "گود" بلي هاد الاستقالة الجماعية ماشي عادية خصوصا وان الاسماء للي فيها فاعلين ومناضلين عندهم امتدادات داخل الاحياء الشعبية والجمعيات المدنية".
وباش 45 عضو استاقلو دقة فوحدة فمدينة فحال اسفي، هادشي ماشي عادي فحزب اعضاءو مرتبطين اغلبهم بحركة التوحيد والاصلاح ولا القطاع النقابي فالتعليم ولا جاو من الجامعة عن طريق التجديد الطلابي، واللي تيكونو مؤمنين بالافكار ديال هاد التنظيمات.
من هاد ناس اللي استقلو رئيس بلدية اسفي، طبعا السبب باين هو الترشيحات والتزكيات اللي دارت فيها الامانة اللي بغات ضدا على القواعد.
شفنا تمنار والشمال وتيزنيت واكادير وكازا وسطات والرباط، روينة عندهم داخليا.
تنظيم البي جي دي غادي لور لور، منذ صعود العثماني للأمانة العامة وتحكم الرباح فهياكل التنظيم، هادشي بيناتهم والمخزن بعيد عليهم.