المزايدة بصورة اخنوش فانستاگرام. حشومة حزب البي جي دي تلى بيه شكام. كيفاش مسؤول التواصل فرئاسة الحكومة كيهدر على صورة الملك. واش بغيتو تربحو "الاحرار" ما تبقاوش تبرگگو وقنعو لمغاربة وديرو بحال بنكيران ف2016

البارح نشر عزيز اخنوش رئيس التجمع الوطني للاحرار فيديو فانستاگرام باش يتواصل مع ناس حزبو. فهاد الفيديو غادية تخاد صورة ودير نقاش: علاش صورة الملك اللاور وعلاش ما معلقاش. ماشي مشكل. شي غادي يعتابر النقاش ما عندو معنى وشي غادي يكون عندو رأي اخر.
لكن اللي ماشي منطقي هو ان شخص مثل نزار خيرون المكلف بالتواصل مع رئاسة الحكومة وحتى مع حزب العدالة والتنمية يتحول لشكام.
نزار ذكي وكيعرف يدير السياسة. ما عرفناش اش من ذبانة قرصاتو. طيح النيڤو فتدوينة ما عندها معنى سياسي. كتب "بغيت نعرف علاش رئيس داك الحزب... حيد صورة جلالة الملك وحطها فالارض وعطاها بالظهر...." اختار الكلمة ووو. فهاد التدوينة بان شكام. كيبرگگ اللي فبالكم باش يقول ليهم: شوفو شوفو رئيس الاحرار واخا هو ما رضاش يسمي حتى الحزب.
هادي كتبين الانحطاط اللي وصل ليه البي جي دي. فينك اليام. ايام العز فحزب المصباح مع بنكيران. مرة كان فمجلس المستشارين. عرف باللي مرات حكيم بنشماش وحتى قياديين اخرين فالبام خدامات فالهاكا وما كيمشيوش بزاف او ما كيمشيوش. ديك الساعة كانت الحرب كبيرة بين بنكيران والياس وصحابو. باش وصلو ليه لخبار وهو فالجلسة٬ رفض يهدر على هاد الشي.
شاف باللي هاداك خصم سياسي خاصو يجاوبو جواب سياسي. نجح فهاد الشي بلا ما يهاجم العائلة واخا خصومو ما داروهاش.
دابا طاح النيفو. صحاب بنعرفة من امثال نزار خيرون من حقهم يهاجمو اخنوش سياسيا. يفتركو برنامجو الاقتصادي يشككو فمعطيات فهاد البرنامج يضربو التوجهات السياسية او الثقافية .... ولكن يبقى النيفو طالع. يحيدو عليهم التشكاميت.
البي جي دي خاصو يبقى حزب مطلع النيفو. دابا ما كاينش معا من تشكمو ولا كيفاش. راه هاد التصرف كيضرب شعاراتكم. وطلعو النيفو.