توقعات نتائج 8 شتنبر.. ها كيفاش الأحرار غايطلع من 37 لأكثر من 100 معقد برلماني وها شحال عند البي جي دي والبام والاستقلال

توقعات ميدانية لنتائج 8 شتنبر 2021، بمثابة استطلاع تنظيمي، خدمات عليها الإدارة العامة لحزب العدالة والتنمية، وعطات أرقام شويا صادمة بالنسبة لهم، وخلاتهم ف حيرة من أمرهم.
نبداو بالتوقعات للي تناقشت وسط الأمانة العامة لحزب العدالة والتنمية، ومن بعد نعطيو الاسباب والمبررات اللي تبناو عليها هاد التوقعات.
بالنسبة لتوقعات النتائج ديال الانتخابات البرلمانية، حسب مصادر "كود"، عطات التفوق لحزب الأحرار بأزيد من 100 مقعد (غانعطيو مثال بسيط علاش، فالشمال مثلا كانو عندهم 3 مقاعد ودبا غايوصلو ل8 بسبب الترحال وعودة الاعيان اللي دا ليهم البام، يعني ثلاث مرات مقاعد 2016 فالشمال).
الحزب المؤهل يجي الثاني، هو العدالة والتنمية، حزب عندو حظوظ للمنافسة بقوة على المرتبة الأولى، ولكن بسبب مشاكلو الداخلية والقاسم الانتخابي الجديد (للي حيدليه كثر من 30 مقعد)، التوقعات عطاتو 80 مقعد تقريبا باستحضار كذلك انه غادي يفقد بعض الاصوات بسبب "غياب" الصقور في الترشيحات بالمدن الكبرى.
الاستقلال والبام غادي يتنافسو على المرتبة الثالثة، وفق ذات التوقعات، بحيث غايكون الصراع على 65 تال 70 مقعد لكل حزب. ورابعا الحركة الشعبية و الاتحاد الاشتراكي (30 مقعد يخلي حزب الاتحاد يدير فريق على خاطرو) ثم التقدم والاشتراكية في الرتبة الخاسمة بشي 25 مقعد أول اقل.
مصادر "كود" فسرت هاد التوقعات ببعض المعطيات، نرجعو لغة الارقام، ف2016 (القاسم الانتخابي كان على اساس الأصوات الصحيحة) البي جي دي جاب مليون و618 الف و963 صوت.. كثر من مليون ونص ديال الاصوات، موراه البام بمليون و216 الف صوت، فرق كثر من 400 الف صوت، والاستقلال جاب كثر شويا من 620 الف صوت موراهم الاحرار ب544118 صوت.
دبا علاش الاحرار يقدر يفوت البي جي دي، منين غايجيب مليون صوت؟ اللي هو الفارق بيناتهم ف2016، مصادر "كود" قالت :
أولا// الترحال السياسي، (بما فيه عودة المرشحين ديالهم اللي سرقهم الياس العماري ف انتخابات 2016)، 50 مقعد برلماني جديد غادي يتزاد بسبب الترحال، هاد 50 مقعد جاو من احزاب (البام، الحركة، البي جي دي..).
ثانيا// إضافة 50 مقعد برلماني كتعني، يلا عطينا لكل مقعد غير 20 الف صوت، كتعني اضافة مليون صوت جديد..
ثالثا// الركود السياسي الحالي، والقاسم الانتخابي الجديد، في صالح الأحرار.
طبعا هادو توقعات، بدون استحضار المفاجآت اللي غاتكون، واخا هاد المفاجآت مستبعدة نظرا لبرودة المشهد الحزبي والانتخابي هاد العام.