شوفو الوقاحة. فشل بوريطة علقو كود. كيفاش تحولات نكبة ديبلوماسية لمحاكمة "رقمية" لينا وكيفاش خلاو ناس هاد لوزير خدمتهم واستمرو فتبرير زلاتو

ول البارح لاربعا خرج قرار محكمة العدل الأوروبية في لوكسمبورغ. هاد الحكم فيه إلغاء العمل باتفاقيتين تجاريتين =الفلاحة والصيد البحري= بين الاتحاد الأوروبي والمغرب، على أساس أنهما تشملان منتجات قادمة من الصحراء الغربية فالجنوب المغربي. هاد الحكم جا بعد شكاية تقدمات بيها البوليساريو وقدمات راسها انها ممثل لسكان الصحرا. وفهاد الحكم حرفيا : "إلغاء قرارات مجلس الاتحاد الأوروبي المتعلقة باتفاقيتين مبرمتين مع المغرب حول المنتجات المغربية من جهة، والصيد البحري من جهة ثانية".
خطورة هاد الاتفاق ديبلوماسية ماشي اقتصادية او تجاربة. هاد المحكمة دخلات فامور سياسية. استندات فالحكم هادا على ان البوليساريو "معترف بها على الصعيد الدولي كممثل لشعب الصحراء الغربية". وان الاتفاقيتين "لم تراعيا ضرورة الحصول على موافقة شعب الصحراء الغربية باعتباره طرفا معنيا بهما"، و"أنهما لا تمنحانه حقوقا بل تفرضان عليه واجبات"
ايلى لاحظو هادي محكمة العدل الاوربية. كتهدر على "شعب الصحراء" و"على الممثل هاد الشعب" وفيه مغالطات كثيرة على هاد الاتفاقية. اي انو حكم سياسي.
نرجعو للاور. نهار تم الاتفاق لمغاربة كلهم وخاصة الديبلوماسية٬ ومن حقها٬ اعتبراتو نصر كبير. شملات الاتفاقية من وجدة حتى لطنجة ومن طنجة حتى لكويرة. اي كاع التراب المغربي. ديك الساعة كان انتشاء للخارجية. صحاب بوريطة اعتابروه ديك الساعة نصر سياسي كبير للمغرب.
لاربعا 30 شتنبر فالصباح باش طاح الحكم بدقايق خرج تصريح مشترك بين وزير الخارجية المغربي ناصر بوريطة والممثل السامي للاتحاد الأوروبي المكلف بالسياسة الخارجية جوزيف بوريل. فيه "سنظل على أتمّ الاستعداد من أجل مواصلة التعاون ... في مناخ من الهدوء والالتزام لتوطيد الشراكة الأوروبية – المغربية" و "سنواصل العمل من أجل تطوير الأبعاد المتعددة لهذه الشراكة الاستراتيجية، بنفس روح التعبئة والانسجام والتضامن".
اي ان بوريطة والاتحاد الاوربي كانو معولين علي هاد القرار. اذن علاش ما دار والو وزير خارجيتنا باش يقنع قضاة محكمة العدل الاوربية. عندو وراق لهاد الشي. ماشي البوليساريو ممثل الشعب الصحراوي. ممثل ديالو هما اللي صوتو فشي مناطق اكثر من 80 بالمائة نهار 8 شتنبر اللي فات فالانتخابات التشريعية والبلدية. ممثلوه هي البنية التقليدية اللي كاينة فمدن لعيون والسمارة وبوجدور والداخلة ... من شيوخ القبايل.... اما البوليساريو راه ما عمرها دارت شي انتخابات ولا عندها شي شرعية شعبية.
الخارجية كان عندها اوراق كثار توظفهم. منها راه ناس الصحرا فالصيد البحري والفلاحة هما اللي مستافدين من هاد الاتفاقية. مثلا فالفلاحة فالداخلة راه شركات حسن الدرهم كتوظف عدد كبير وهو ولد المنطقة وفلوسو مستثمرة فالمنطقة. كلشي لصحرا ولناسها. وقيس على هاد الشي فالصيد البحري.
مع كاع هاد الاخطاء اللي دارتها الديبلوماسية٬ ما خلات فين تعلق فشلها الا ف"كود". هاداك الدبان اللي مخدماه هاد الخارجية٬ عوض يبرر فشلو٬ ناض كيهاجم "كود". علاش كتبنا موضوع فعنوانو "تصرفيقة للمغرب" و"لديبلوماسيتو المنفوخة".
دبان بوريطة وناسو اللي مجندهم يدافعو عليه وعلى استمرار استوزارو عوض الدفاع على مصالح البلاد لكبيرة٬ ما خلاو ما قالو ف"كود".
الدبان غادي يبقى دبان وماشي امثال هادو اللي غاديين يحددو اش نا هي الوطنية وفين هي مصالح بلادنا. مصالحو فرجالات قادرين يدافعو عليه وعلى مصالحو.
هم بوريطة كيف كنقولو ديما فالمقال الاول هو صورتو الشخصية. وجرب شي حد ويجبدو ويكتب عليه وشوف باش غاديين يتاهموه. غاديين يتاهموه باللاو وطنية والخيانة. هاد الشي حقاش كتقول هاد السيد ما دارش خدمتو. ما فيدوش. ما صالحش. والمغرب عندو ناس كثيرة يديرو هاد العمل مزيان.
دابا غير يقول لينا. هاد البنت اللي فالصورة فلقاء ببروكسيل مع الاتحاد الاوربي. يشرح لينا بوريطة اش من صفة كانت حاضرة. شكون هي. ايلي عرفتو هاد الشي تفهمو امور كثيرة. ها هي حاضرة اجتماع رسمي وفيه رضى الشامي باش كان سفيرنا فالاتحاد الاوربي.
شوفو يا دبان بوريطة. ايلى طاحت صومعة بوريطة علقو كود راها هي الحجام.