قيادي من الاغلبية ل"كود": بلا تنسيق بيناتنا ما يمكنش نطبقو برنامجنا الحكومي اللي فيه استجابة مستعجلة لمتطلبات المواطنين

البارح فالصباح كيف قالت "كود" دار اجتماع فالرباط لتحالف الاغلبية الحكومية فالرباط باش يوقفو البدية المتعثرة لهاد التحالف. وفق قيادي من التحالف ل"كود" فان الاجتماع كان للتنسيق للعمل المستقبلي ماشي لشي حاجة اخرى. وكانت انتقادات داروها احزاب الاستقلال والبام فالبرلمان للبرنامج الحكومي وهو ما بان بداية عوجا لهاد التحالف اللي فيه الاحرار والبام والاستقلال. فهاد السياق شدد المصدر ل"كود" ان هاد التنسيق بين كافة مكونات الاغلبية وتقوية التشاور والتعاون هي الطريق الوحيدة باش نستاجبو كحكومة بشكل مستعجل لمتطلبات لمغاربة.
طبعا كل من عزيز اخنوش وعبد اللطيف وهبي ونزار بركة بالاضافة رؤساء الفرق فهاد المجلسين كلهم هدرو٬ وفق مصدر "كود"٬ على ضرورة كلشي يديها بمسؤولية فانتظارات لمغاربة.
حتى التواصل هدرو عليه يقول القيادي فهاد التحالف ل"كود"٬ اذ تقرر الخروج لتقديم اجابات على القضايا المثارة وعندها علاقة بوعود الحملة الانتخابية وجاب فالبرنامج الحكومي
وفق قيادي التحالف فانه تم الاتفاق على البدء فكتبة ميثاق الاغلبية باش يكون هو الاطار والمرجع اللي فيه كيفاش نخدمو ونتعاونو كاغلبية فالحكومة والبرلمان بغرفتيه....
يتوقع التوقيع على هاد الميثاق بعد الاتفاق على الصياغة المقترحة من لجنة ثلاثية فيها الاحزاب الثلاث