واش هاد عبد المجيد ولد عباس الفاسي عندو علاش يحشم ولا والو؟.. من نهار نجح فالانتخابات الفايتة وماعمرو رجع لفاس ودبا عاد فاق وقاليك خاص يدار سونتر ديال البومبية فالمدينة القديمة – وثيقة

النائب البرلماني عن حزب الاستقلال، عبد المجيد الفاسي، ماعندوش علاش يحشم كَاع. البارح الثلاثاء شعلات العافية في سوق "الرصيف" بالمدينة القديمة لفاس. التجار تضررو بزاف من هاد الحادث والسلطة بينات أنها غادي تعوض كولشي.
نرجعو لهاد عبد المجيد ولد عباس الفاسي. السيد ناض كيطير من بلاصتو، وقاليك وجه سؤال سؤال كتابي لوزير الداخلية حول "ضرورة إحداث مركز للوقاية المدنية بالمدينة العتيقة" بعد الكارثة التي عرفها السوق العتيق "الرصيف".
دبا أسي عبد المجيد واش عندك علاش تحشم أو لا وجهك مقزدر؟. واش نتا ساكن فالرباط وجاي دبا تهضر على مشاكل فاس وشنو خاصها و و و.. إييه نتا برلماني محسوب على فاس وهذا أصلا خطأ كبير كان دارو نزار بركة، الأمين العام لحزب الاستقلال، مللي عطا لواحد بحالك التزكية باش يترشح فمدينة ماكيعرف عليها والو وماعارف حتى سميات الشوارع والزناقي ديالها.
عبد المجيد الفاسي اللي دار سؤال من الرباط على مشكل واقع ففاس. هاد الحادث ماعاشوش هاد البرلماني المغرور. واش عارف راسك من نهار نحجتي فالانتخابات الفايتة أسي عبد المجيد عمرك رجعتي لفاس إلا شي مرة أو جوج طليتي وزدتي فحالك؟. ناس فاس مامحتاجينش واحد بحالك يدافع عليهم من الرباط.
وكان كنتي ياسي عبد المجيد بصح باغي تمثل الساكنة لوكان كَلسي عشتي معاهم ففاس وبقيتي قريب للناس ديال هاد المدينة. ماشي تهضر من العاصمة وتقول خاص وخاص... نهار درتي الحملة الإنتخابية راه معروف شكون عاونك وشكون كان كيوريك فين تمشي ففاس وهادشي راه داروه على وجه باك عباس الفاسي ماشي على وجهك نتا.
ولد عباس الفاسي قاليك خاص مركز ديال الوقاية المدنية فالمدينة القديمة ديال فاس. إييه عندك الحق فهادي. كاين مشكل وخاص هاد السونتر يدار لكن هاد الطلب أو السؤال اللي وجهتي لوزير الداخلية خاص يطرحو شي برلماني اللي عايش ففاس وعارف فين جا "الرصيف" وفين جات البطحاء والطالعة و و و و.. سير تكمش يا عبد المجيد وخلي عليك فاس.