قصة "عفط على مو" والمضاربة قدام مقر ال"PPS".. بنعبد الله ل"كود": 30 بلطجي تهجمو علينا ماشي اعضاء فالتقدم والاشتراكية ومايمكن لي الا ندافع على حرمة الحزب اللي كنعتبرو فحال داري

كشف محمد نبيل بنعبد الله، الأمين العام لحزب التقدم والاشتراكية، تفاصيل الاحداث لي وقعو لبارح فمقر الحزب خلال اجتماع اللجنة المركزية، بعدما هجمو عليه بعض انصار المعارضين ديالو، وعلق على ديك العبارة لي جات ففيديو منشور على مواقع التواصل الاجتماعي فيه عبارة ""وعفط على ..".
بنبعد الله قال ل"كود" :"جابو لينا 30 بلطجي ومخلصينهم باش يهجمو علينا، حنا كتشفناهم وعرفنا حقيقتهم"، مضيفا :"باش يقحتمو الحزب، التقدم والاشتراكية عندو حرمة وعندو مناضليه باش يدافع على راسو ورفضنا نعيطو للبوليس حيث اكتشفنا بلي هادو مخلصينهم وممكن اقناعهم يمشيو فحالهم".
وكشف المتحدث ل"كود" :"ملي هضرنا مع زعيم العصابة لي جابو، وتفاهمنا معه مشاو بحالهم وبقا دوك 4 المناضلين السابقين لي طردناهم من الحزب لأسباب اخلاقية". مؤكدا بأنه :"انا مكرهتش نعيط لهاد السيد لي حرض علينا البلطجية، ونعطيها كلمة ويتكلم، ولكن للاسف بدون مستوى".
وأضاف زعيم البي بي اس :"أكثر من ذلك، البؤس الذي يحمله هؤلاء يجعل بأنه ولو قمت باستدعائي من حرضهم من اجل الحوار، فهو ليست لديه القدرة في الحوار والنقاش، مضيفا :"وقعات كسيدة فالمؤتمر السابق وهاد العضو طلع للمكتب السياسي، وهو ضعيف سياسيا وطردنا لأسباب أخلاقية".
وزاد المتحدث :"فالوقت لي هجمنا على الحكومة ووصفناها بأنها ضعيفة سياسيا وديمقراطيا، وقلنا كنرفضو هاد الارتفاع الصاروخي فالاسعار، فهاد الوقت كتجي هاد البلطيجة وكيولي الكلام عليهم بلاصت التقرير السياسي لي فرش الحكومة".
وجوابا على سؤال "كود" :"وكيفاش ولى عندك غير الاجماع ومبقاتش عندك معارضة داخلية"، قال نبيل :"انا اشد المدافعين على المعارضة السياسية، وكون كانت شي معارضة تلقاني انا الأول، ولكن باش تجيب 30 عنصر مسخر ومأجور باغين يخربو المقر ديال الحزب، وانا الامين العام لو كان لي نخرج وندابز بالايادي كمناضل دفاعا عن الحزب لقمت بذلك".
وتابع :"اعلم انه يلا خرجت ودابزت، مغاديش نبان كندافع على الحزب وناس غاتقول نبيل كيهاجم على الناس".
وشدد بنعبد الله ل"كود" :"انا اتحمل المسؤولية، لأنني مناضل"، مضيفا :"راه لباس خرجات مني غير ديك الكلمة (وعفط على..) راه لباس مدرتش كثر أمام عناصر بلطجية بغات تهاجم على داري (مقر الحزب)"، مستطردا :"كون كانو مناضلين نقبل بالنقاش معم، ولكن ناس جاو بوجوه بلطجية باغين يتعداو علينا وحنا دافعنا على راسنا".
وختم بنبعد الله مخاطبا صحفي "كود" ":"انا أترجاك وتمشي تدور على اعضاء المكتب السياسي كاملين واللجنة المركزية واحد واحد ومسؤولي الحزب اقليميا، يلا لقيتي واحد صرح ليك بأنني مسلط، التزم بتقديم استقالتي ومغاديش نتسنا المؤتمر المقبل".
يشار بلي حزبُ التقدم والاشتراكية عقد الدورة التاسعة للجنته المركزية، يوم السبت 18 يونيو 2022، بمقره الوطني في الرباط. وقد صادقت اللجنة المركزية، بالإجماع، على التقرير السياسي الذي تناول الأوضاع العامة على الصعيد الوطني، تقدم به الأمين العام محمد نبيل بنعبد الله، باسم المكتب السياسي، وكذا على المقرر التنظيمي ومختلف لجان تحضير المؤتمر.