عبد اللطيف وهبي وزير العدل بان فرحان بحال شي دري صغير فاول صورة ليه من جولة غادي يزور فيها 8 دول عربية. الصورة تخادت من اول محطة فهاد الزيارة وهي السعودية وتصور مع وزير العدل ديالهم. الفرحة ما قاداهش. ماشي حيث كاين فجدة السعودية اللا. حيث اخيرا بدا كيحس براسو ان تران التغيير الحكومي يمكن. كنقولو يمكن. ما غاديش يدخل فيه. وهبي بعد ما نشرات جون افريك خبار باللي غادي يكون تعديل حكومي وغادي ينزل من الحكومة هو وميراوي وزير التعليم العالي٬ والسيد حالتو حالة. حتى حزبو تخلى عليه. ظهرات قوة تيار مراكش اللي كتزعمو فاطمة الزهرا المنصوري ومساعدها فهاد الفيلم رئيس جهة مراكش كودار. وهبي حس بكلشي تخلى عليه. هاد الشي علاش بان فرحان بزاف. فهم الميساج باللي الغضبة اللي عليه تقدر تكون من الماضي. دابا ترسل رسميا لدول عربية. خدا الاذن ماشي كيف مشى شي مرة لفرانسا وتلاقى وزير عدلها. يمكن مازال محتاجين لوهبي. يمكن يكون محامي ناجح لاصلاح القانون الجنائي. هادي هي الرسالة اللي بانت من الزيارة. اما ديك الهدرة الخاوية ديال وزير عدلنا مع وزراء عدل السعودية والبحرين والكويت وقطر وعمان والامارات والاردن ومصر. فكل دولة كيهدر على التعاون الثنائي٬ راه ما شاداش.
