ولا كان الفيلم كولو ضد بودريقة البرلماني. جابو سكرتيرة النوطير وكمبيوتر ديالو واللغز فالباتول والعلوي السماسرية

في اخر تطورات ملف لهريف على الاراضي فكازا ،كشفات مصادر "كود " ،ان عناصر الفرقة الوطنية لشرطة القضائية بكازا اجرت اليوم الجمعة مواجهة بمقرها بشارع الروداني بين الطاشرون شقيق البرلماني والموثق الذي ابرم العقد و المرأة التي انتحلت مالكة العقار المدعوة الباتول و السماسرية فيهم العلوي
حسب مصادر "كود" البوليس جاب اليوم سكرتيرة النوطير والكمبيوتر ديالو بعد ما مشاو وقلبو باذن النيابة العامة فوثائق كتعلق بهاد القضية
فهاد القضية كانت مواجهات بخصوص ارض مساحتها گطار و700 متر مربع. كاين تضارب بخصوص واش هاد الارض مازال فاسم الهالكة ولا اللا. شي كيقول راه تحولات وشي كيقول مازال احد الان فاسمها فالمحافظة
دابا الفيلم كولو داير على الباتول السمسارة اللي انتحلات صفة الراحلة بعد ما كان عندها لاكارط ناسيونال ديالها
المصدر ديال "كود " تيضيف ،ان الورثة اكتاشفو ان الارض تباعت لشركة ديال الطاشرون الامر لدفع احد الورثة الى تقديم شكاية الى الجهات القضائية بعدما اكتشفو عملية التزوير
الملف مشا عند الفرقة الوطنية هي لفتحات لانكيط فيه ،بحيت استدعات الطاشرون والموثق او مجاوجش عندها باش اجوبو على الشكاية ،هذا الشي خلا الفرقة الوطنية تربط الاتصال بالنيابة العامة المختصة التي صدرت امر باغلاق الحدود في حقهم ،بعدها تم توقيف عبد الله بودريقة الطاشرون شقيق البرلماني٬ وموثق كازاوي خدام مع الشركة =ي س= بمطار محمد الخامس الدولي بعدما كانو مسافرين خارج ارض الوطن .
دبا راه الطاشرون والنوطير و الباتول والسماسرة تحت تدابير الحراسة النظرية بمقر الفرقة الوطنية فكازا من اجل مواصلة البحث معهم ،وذلك للكشف عن جميع الامتدادات والارتباطات المحتملة للأشخاص الموقوفين بهذا الريزو ديال لهريف ديال الارض ، وكذا توقيف جميع المتورطين في هذه الفيلم
مصدر مقرب من النوطير قال ل"كود" قال باللي هاد الاخير ومعاه حتى الطاشرون غير ضحية. واضاف "كون كان شريك فهاد النصب ما يديرش البصمة. كان يكتفي غير بالتوقيع. علاش غادي يديرها كاع" واضاف ان السماسرة كان الهدف ديالهم يورطو ماشي الطاشرون بل خوه البرلماني محمد بورديقة واضاف حاجة اخرى ل"كود" "دابا كيطلبو من بورديقة يخلص الارض ب1600 درهم للمتر المربع عوض 600 باش شراها. راه ابتزاز وكلشي غامض" يختم مصدر "كود"