الركراكي: المغاربة شافونا وصلنا للربع ولاو طامعين نديو كأس العالم وحنا باغيين نفرحوهم

كشف وليد الركراكي الناخب الوطني على الطريقة اللي كيتعامل بها المنتخب الوطني المغربي مع الضغط ديال الجمهور اللي تزادت الطموحات ديالو من بعد التأهل لربع نهائي كأس العالم قطر 2022، واللي غادي يلعب فيه ضد البرتغال غدا السبت.
وقال وليد الركراكي فالندوة الصحافية اللي كتسبق ماتش المغرب والبرتغال: "حنا ديما كنلعبو بالضغط حيث عندنا جمهور كيطلب كثر من داكشي اللي كانديرو وهادشي عادي عندنا".
وكمل الركراكي: "ملي جينا لكأس العالم حتى حد ما كان كيحلم غادي نربحو شي ماتش فالدور الأول وحققنها، وبداو كيحلمو نتأهلو للدور الثاني ودرناها، ودابا دزنا للربع، وراني كنعرف المغاربة وكنعرف الجمهور العربي غادي يطمعو نديوها، راني عارف هاد الضغط اللي علينا ولكن راه ضغط إيجابي وهادشي اللي مهم، حيث خاصها تدفعنا للقدام باش تخلصنا من الضغط السلبي اللي ما غاديش يخلينا نلعبو".
وزاد أكد الركراكي وقال: "راه الضغط ديما معنا حيث كنحسو بالمغاربة والعرب والأفارقة ورانا وحنا باغيين نفرحوهم وهاد الضغط خاصو يكون بوزيتيف والدور ديالي أنا والطاقم التقني نخليو اللعابا مرتاحين ويعطيو اللي فجهدهم".