مودريتش: هادوك اللي هاجمونا نهار تعادلنا معهم شفتو المغاربة فين وصلو

أكد لوكا مودريتش نجم المنتخب الكرواتي أحد أطراف المربع الذهبي فكأس العالم قطر 2022، أن المنتخب الوطني المغربي قوي، والدليل الوصول ديالو لنصف نهائي المونديال، وأن العروض القوية اللي قدمو الأسود فكوب ديموند والمنتخبات اللي قصاو رفعت عليهم الحرج هم كمنتخب كرواتي، من بعدما تعادلو معهم فأول ماتش فالبطولة، وأكد بلي هذاك التعادل كان ثمين وجيد.
وتحدث لوكا مودريتش فحوار جراه مع "rtve" الإسباني على منتخب إسبانيا اللي ودع البطولة على يد المغرب، وقال بلي عندها منتخب زوين وكان عندها مدرب مزيان ولكن هادي كرة القدم، وقال: "لعبنا مع المغرب فأول ماتش لنا فكأس العالم وما ربحناش، وبدا كلشي فكرواتيا كينتقد فينا حيث ما حققناش الفوز على المغاربة.. شفتوهم فين وصلو دابا.. راه اللعب معهم معقد وراهم خصم صعيب على كلشي".
وكان المنتخب الوطني المغربي تعادل ضد منتخب كرواتيا فأول جولة من دور مجموعات كأس العالم قطر 2022 بنتيجة زيرو لزيرو، ومن بعد منها قدرو يتأهلو من لكروب 6 وداز المغرب متصدر وكرواتيا وصيف له فالمجموعة على حساب بلجيكا وكندا، ومن بعدها تأهل المغرب على حساب إسبانيا فالثمن والبرتغال فالربع، أما كرواتيا فتأهلت على حساب الجابون والبرازيل، والمنتخبان دابا فنصف النهائي وغادي يلعب المنتخب المغربي مع فرنسا وغادي تلعب كرواتيا مع الأرجنتين.