واش لاباس. راه قطر اللي خاصها تشكر المغرب ماشي العكس. شفت كلشي شكرا قطر. راه بلا المغرب كان غادي يكون تركيز فالمونديال على لفضايح اللي دارت من نهار خدات التنظيم حتى الرشاوى فالبرلمان الاوربي وهاد الدولة اقل ما يمكن دير دابا هو قنصلية فالداخلة

بشكل كثر من لحيس الكابة شفنا كلشي لمغاربة اللي كيدوزو فشي قناة قطرية =بيين سبور منها= او شي جورنال ديالهم٬ كيبقى يردد بغباء "شكرا قطر" "شكرا على حسن التنظيم". ... كيحسسو هاداك الصحافي اللي كيسولو باللي كاين دين قطري على المغرب. واش شوية لاباس.
اللي عندو دين بصاح هو المغرب على قطر. هاد المونديال تعطى لهاد الدولة فظروف العالم عارفها. شفنا اش وقع لهادوك اعضاء اللجنة التنفيذية للفيفا اللي صوتو لصالح تنظيم هاد المونديال فقطر. عرفنا شحال من واحد تشد منهم.
من بعد كان نقاش كبير علي حقوق العمال اللي خدمو البينات التحتية اللي وجداتها قطر. تقارير حقوقية هدرات على 6 الاف عامل مات فالاوراش. هاد الرقم ديما كتكذبو السلطات القطرية. شفنا النقاش على حقوق المثليين وكيفاش ناس قطر جاوبوهم بلافتة فيها فلسطين وعلقوها فيديهم. شفنا النقاش على الشراب واش يبتاع فالتيرانات وكيفاش قطر قولبات كلشي. قالت ما غاديش يتباع. كاينة غير بيرا حلال ولكن فالفضاءات اللي فيها الشخصيات الشراب ما بغاهش بوبي. فنفس التيران. الشراب حرام. الشراب حلال.
لكن هاد النقاشات اللي كانت بدات فالمونديال نقصات حدتها وكان للاسود دور كبير فهاد الشي. بعد الانتصار على بلجيكا بدات الهدرة على المنتخب. تزادت بعد ما تأهلنا اللولين فالمجموعة ديال الموت فيها كرواتيا وبلجيكا وكندا. لعبنا مع الصبليون فالثمن وربحناهم. زدنا ربحنا البرتغال فالربع.
دابا الصحافة فالعالم ولى عندها الخبر الرئيسي انجازات الاسود. حتى ايلى كانو مقالات كنتنقد قطر ما بقاش كتشاف. سحر الكورة بان من جديد. منتخب ما كان حتى حد منتابه فيه تصدر الصحفات الاولى لكبريات الصحف العالمية.
هنا قطر خاصها تشكر المغرب ماشي شي مغاربة كيطيحو من قيمة بلادهم يشكروها. راه الاسود هو اشهر واكبر حدث فهاد المونديال. غطى علي كاع الاحداث.
حتى هاد لفضيحة ديال رشاوى عطاتها قطر لنواب اوربيين واعتقال بعضهم واللي تفجرات هاد 24 ساعة ما قدراتش تتصدر الصفحات الاولى لصحف العالم حقاش الاسود غاديين يلعبو نص نهاية كأس العالم.
كاينة مواضيع على هاد القضية ولكن ما قدراتش تكون فالواجهة. علاش؟ كاين الاسود. كاين المغرب.
قطر خاصها ما تنساش هاد الشي. اقل حاجة ممكن ديرها هاد الدولة قبل نهاية المونديال الاعلان على فتح قنصلية ليها فالصحرا. دارتها الامارات والبحرين وقطر مازال ما بغاتش. مازال كتسوق باللي هي دولة باغية ترضي الجزائر وترضي المغرب. الحياد المفترى عليه وصافي.
قطر خاصها تشكر المغرب حقاش لمغاربة اللي دخلو لقطر خسرو فلوس كثيرة. روجو السياحة. روجو لمدينة. روجو الدولة كلها. نعاودها للمرة الالف. قطر اللي خاصها تشكر المغرب. لمغاربة ما خاصهم يشكرو حتى حد غير ريوسهم. غير منتخبهم. غير كل واحد ساهم فهاد الحدث الحلم. اواه حتى حلمنا خاصنا نشكرو وحدين ما دارو فيه تا وزة.