مدرب كرواتيا: غادي نتقاتلو على الميدالية البرونزية ضد المغاربة والماتش الجاي مختلف على اللول

أكد زلاتكو داليتش مدرب كرواتيا أن المنتخب ديالو غادي يلعب ضد المنتخب الوطني المغربي باش يربح الميدالية البرونزية فالماتش اللي غادي يجمع الطرفين السبت الجاي، على تحديد المركزين الثالث والرابع فكأس العالم قطر 2022، واعترف بالقوة ديال المنتخب المغربي.
وقال زلاتكو داليتش اللي سبق له قاد كرواتيا لنهائي مونديال 2018 ، وخسر دومي فينال فالمونديال الحالي مع الأرجنتين (قال) فتصريح له: "غادي نتقاتلو باش نربحو الماتش ديال المغرب ونحققو الميدالية البرونزية فالبطولة حيث غادي يكون إنجاز زوين".
واعترف المدرب الكرواتي بقوة المنتخب المغربي وقال: "المغاربة هم أكبر مفاجأة فالمونديال راه قصاو منتخبات كبيرة فحال بلجيكا وإسبانيا والبرتغال منتخبهم محترم والماتش اللي لعبنا ضدهم فأول جولة من كأس العالم مختلف على ماتش السبت ديال تحديد المركز 3 و 4".
للإشارة فكان المنتخب الوطني المغربي تعادل مع المنتخب الكرواتي فأول جولة عن دور المجموعات من كأس العالم قطر 2022، بنتيجة زيرو لزيرو، والمنتخبان تأهلو عن لكروب 6 ووصلو لدومي فينال، وخسر المنتخب المغربي مع فرنسا وخسرت كرواتيا مع الأرجنتين وداب غادي يلعبو على المركز الثالث.