رئيس جامعة سطات الجديد دار أول إجتماع وغادي يبدا زياراتو من كلية الحقوق.. "وها تفاصيل هاد الاجتماع

رئيس جامعة الحسن الأول فسطات، عبد اللطيف مكرم، لي كلشي متفاءل به ينوض الجامعة بعدما غرقات بالفضايح دار بداية هذا الاسبوع اول إجتماع جمع فيه گاع الموظفين ديال الرئاسة فلقاء تواصلي واخا غير تواصلي كانو فيه رسائل وبانت فيه كاريزما الرجل.
حنايا في "گود" كيف ديما كنحاولو نكونو مع السكوبات، ولهادا من لبارح وحنا كنبحثو فتفاصيل الاجتماع، بحيث كشفات مصادر خاصة ان الرئيس قال بالحرف ماباغيش المخاصمات ما بين الموظفين على الاقل داخل الجامعة، لان الناس جاية لوظيفة عمومية ماشي جاية تدابز.
وأكد الرئيس فهاد اللقاء انه ماغاديش يتساهل مع أي واحد ساء لشي استاذ او طالب لانهم هما عماد هاد الجامعة، وزاد قال انه غادي يبدا جولة فالمؤسسات لي تابعين ليه وليغادي يبداها من كلية العلوم القانونية والسياسية اليوم الأربعاء لي رجعات للفضائحية ديالها بحال قبل ولي منين سمعو الرئيس غادي يبدا بهم كلشي شاد قلبو.
الرئيس غادي يكمل مع المؤسسات الاخرى بحال ليفيستي لي هي نموذج يدرس فالتسيير وغادي يكون نهار 14 مارس بالمدرسة الوطنية للتجارة والتسيير لي حتى استطعات ترجع لمكانتها.
ومزال غادي الرئيس يدير لقاء عمل نهار الخميس مع موظفيه حينت لقاء لي سبق كان غا ديال التعارف.