سليمان الريصوني، للي غايوقف أمام قاضي التحقيق نهار 11 يونيو المقبل، بتهمة الاعتداء الجنسي على شاب من مدينة مراكش، وللي ناضو شي محسوبين على شي جمعيات، من بينهم واحد الجمعية كتسمي راسها منظمة مراسلون بلا حدود، للي ما بحثت ما تقصات فالأمر ، واعطات حكم البراءة للمتهم بلا ما تكون عندها لا معلومات ولا معطيات، وقبل ما يقول القضاء الكلمة ديالو فالقضية، من المفروض أن الناس يعرفوه بالضبط شكون هو، وشنو هي الأفكار ديالو، وشنو هي القناعات ديالو، وشنو هو التكوين ديالو، باش ما يغلطوش فيه، وما ياخذوش عليه فكرة خاطئة من خلال الصورة البطولية المزيفة للي كيروجوها عليه بعض الناس للي كياكلو الثوم بفمو.. فيما يلي مجموعة من المعطيات للي من المفروض الناس يعرفوها عليه، باش الأمور تكون واضحة، وباش أصحاب الأجندات الخبيثة المبنية على تخراج العينين، يسكتو شوية.
أحمد الريصوني من ابرز قطاع الطرق بالشمال في تسعينات القرن الماضي شنو هي البيئة للي تربى فيها هاذ الشخص؟ عائلة سليمان الريصوني أصلها من بادية تابعة لمنطقة قروية، ثلاثاء ريصانة، ما بين مدينة القصر الكبير ومدينة العرائش، وبالضبط لجماعة قروية اسمها ريصانة الشمالية، للي موجودة على بعد 31 كيلومتر شمال غرب مدينة القصر الكبير، وعلى بعد 24 كيلومتر شمال شرق مدينة العرائش، ومجاورة من الجهة الغربية لجماعة الساحل الواقعة على الساحل الأطلسي شمال مدينة العرائش.... ومعروف على أهل هاذ المنطقة أنهم من الفلاحين للي كيمارسو الفلاحة والزراعة والرعي. وإيلا كانوا أفراد من الريصونيين كيروجو أنهم من الشرفاء، فراه إيلا رجعنا للتاريخ المغربي فمنطقة الشمال، غانلقاو بأن الأمر فيه التباس كبير، وصعيب الواحد يتكلم على الوجاهة وعلى مفهوم الشرفاء بالمعنى الديني للكلمة.. علاش الأمر صعيب وفيه التباس؟.. بكل بساطة لأنه في بداية القرن العشرين كان موجود واحد الشخص إسمو أحمد الريصوني، فقرية اسمها الزينات تابعة حاليا لدائرة أصيلة بإقليم طنجة. وحسب عدد من المراجع التاريخية المغربية، أن هاذ الشخص، فتسعينيات القرن 19، جمع عليه الناس من قبيلة بني عروس الجبلية، للي كانت قرية الزينات موجودة فيها، وبدا كيمارس التهريب وكيقطع الطريق على القوافل للي كانت كتنقل السلع والبضائع فالشمال الشرقي للمغرب، فعهد السلطان مولاي الحسن الأول العلوي.. وهاذ السلوك جعل عامل مدينة طنجة عبد الرحمان ولد صدوق، يجند عدد من أفراد القوات العسكرية ويعتقلوه، ويسيفطو مسلسل للسجن فمدينة الصويرة، ويوقف السيبة للي كان دايرها فالمنطقة هاذ الشخص، للي كان كياخذ الأراضي ديال الناس وكيعتبرها فالملكية الخاصة ديالو، ويوزع القليل منها على الأتباع ديالو للي ولّاو كيسميواه مولاي الشريف أحمد الريصوني. وبقى هاذ الشخص حسب العديد من المراجع التاريخية المغربية عامين فالحبس ديال الصويرة..ومللي وصل السلطان مولاي عبد العزيز العلوي لحكم المغرب، عفا عليه بتدخل من المستشار ديالو محمد الطريس، للي غايندم بزاف من بعد علاش توسط ليه عند السلطان باش يعفو عليه.. وفالفترة للي رجع فيها أحمد الريصوني من الحبس فالصويرة للبوادي التابعة لطنجة فين تزاد وكبر، بعفو من السلطان مولاي عبد العزيز، للي اعتقد أن هاذ الشخص يمكن يبان فيه الخير، ويرجع للطريق، تزادت حركات التمرد والسيبة، وظهرو قطاع طرق آخرين بحال بوحمارة فوسط وشرق المغرب، وتزادت عمليات القتل والسلب والنهب، وفهاذ الأجواء لقى أحمد الريصوني المبتغى ديالو، ورجع لعوايدو، وجمع الشتات ديال الناس للي كانو كيقطعو معاه الطريق، وولى هو للي كيحكم منطقة جبالة، وبنى لنفسو قصر كبير وفاخر فمدينة أصيلة مازال موجود لحد الآن وتحول لمؤسسة تابعة لوزارة الثقافة، وولى هاذ الشخص معروف بالجبروت والبطش، وتمرد على السلطة المخزنية المركزية، ومارس الاختطاف ديال عدد من الأجانب ومن رجال المخزن، وكان كيطلب الفدية باش يطلق السراح ديالهم، وبقى كيصول ويجول فالمنطقة، ياخذ أرض الناس بقوة السلاح بتهمة أنهم متواطئون مع الحكم المخزني المركزي، ويقتل البعض بتهمة أنهم ما راضيينش بيه يكون قائد على المنطقة، حتى مرض بداء الوذمة ومات عام 1925 وخلى لولادو وحفادو والأقرباء ديالو عدد ديال الهكتارات من الأراضي الزراعية للي خذاها للناس، وأصبح العديد من الريصونيين ملاك أراضي فلاحية، وكاين للي باقي لحد الآن منهم للي كيقول على راسو بأنه شريف. تابعو معانا الحلقة الثانية قريبا...
