تنفرد بنشرها “كود” سلسلة “كيفاش السلاطين ديال المغرب كايشوفو “ريوسهوم” وكايشوفو السلطة ديالهوم وكايحميوها؟ بروز المؤسسة الملكية كفاعل سياسي مهيمن…الرمزية السياسية للسلطان كخليفة للمسلمين(2) ح 107

إذن، ابتداء من 1940، السلطان سيدي محمد بن يوسف، أمام الفراغ للي خلاوه قادة “الحركة القومية” في الساحة كيف ما شرحت في السابق، غادي ياخذ المبادرة، ويقوم بتوظيف مؤسسة إمارة المؤمنين المرتبطة بالبيعة، في جميع الخطوات ديالو إلى حين تنحيته عن السلطة في عام 1953…بحيث بهاذ الصفة، كانت الصلاة في جوامع المملكة كاتتقام بسميتو، والحسن الثاني كايقول لينا في كتابو “التحدي” بللي الصلاة كانت كاتتقام باسم السلطان سيدي محمد بن يوسف بوصفو أمير المؤمنين، مقرون بذكر اسم “ولي العهد مولاي الحسن” ابتداء من عام 1931، وما عرفتش شخصيا آشنو هو وجه الصحة في هاذ الكلام لأنني ماصادفتوش عند شي مؤرخ من المؤرخين المعترف بيهوم أكاديميا !! ناهيك عن “حقوق السكة”، مادام أن النقود كانت كاتحمل الإسم ديال السلطان أمير المؤمنين سيدي محمد بن يوسف…
بهاذ الصفة ديال أمير المؤمنين، سيدي محمد بن يوسف صلى بالناس نهار الجمعة، ولقى عليهوم خطبة الجمعة، وذككرهوم بللي أنه ما كايقوم إلا بإعادة ما سار عليه الخلفاء وأمراء المؤمنين في “دار الإسلام منذ أن كان الإسلام”، وأنه “ما كايقوم إلا بتجديد هاذ التقليد للي تلاشى في باقي بلدان العالم الإسلامي”، وكان هاذ الشي في “الجامع الأكبر” ديال مدينة طنجة بتاريخ 11 أبريل 1947، في الوقت للي منطقة الشمال كانت خاضعة للحماية الإسبانية…
وقبل من هاذ التاريخ، الجميع يتذكر أن سيدي محمد بن يوسف في عام 1933، خذا واحد القرار غير مسبوق في تاريخ الحماية مللي قام بمنع المظاهرات للي بغات بعض الزوايا الصوفية تقوم بيها في بعض المدن المغربية، بحجة أن “الدين والتدين” هو من احتكار “أمير المؤمنين”، وبالرغم من أن الجميع كان كايدرك أن السلطان كان كايدافع على السلطة ديالو ضد عبد الحي الكتاني ومن والاه !!
بالإضافة لهاذ المبادرات، كاتحضرني ثلاثة ديال الوقائع للي وقعات قبل نهاية الحرب العالمية الثانية، وللي كاتبيين الطريقة للي استعمل بيها سيدي محمد بن يوسف الرأس مال ديال إمارة المؤمنين باش يسترجع الهيبة ديالو من الحماية الفرنسية…
– في 1933، جريدة “عمل الشعب” نظظْمات واحد الحملة وطنية من أجل ترسيم “عيد العرش”, وبمدينة الرباط، تأسسات واحد “اللجنة مركزية لعيد العرش” مكونة من الممثلين عن اللجن المحلية الموجودة تقريبا في جميع المدن المغربية، وعْطات الرئاسة الشرفية للمقيم العام الفرنسي “هنري بونسو” Henri Ponsot والصدر الأعظم “المُقري”…هاذ المبادرلاة لقات استحسان وتجاوب كبير في صفوف المغاربة، وهو الأمر للي خلا الإقامة العامة الفرنسية أنها تتجاوب معاه، وتدير من هاذ العيد “عيد رسمي” بمقتضى مرسوم “وزيري” مؤرخ في 26 أكتوبر 1934، مع الإعلان على الاحتفال بأول عيد العرش في تاريخ 18 نونبر 1934…وفي نفس الوقت كانت هاذي مناسبة بالنسبة لجميع الفاعلين السياسيين آنذاك أنهوم يشرعو في استغلال هاذ المناسبة ديال عيد العرش في المخططات السياسية ديالهوم حول “شخص الملك” !!
– في تاريخ 8 ماي 1934، بانت بوضوح شعبية السلطان سيدي محمد بن يوسف بمناسبة الزيارة الرسمية للي دارها لمدينة فاس. و”روبير ريزيت” R. Rezette لاحظ في متابو حول الأحزب السياسية المغربية هاذ الشعبية للي بدا كايتمتعْ بيها السلطان انطلاقا من الشعارات للي رفعوها الفاسيين أثناء الزيارة بحال مثلا: “عاش الملك ! عاش ولي العهد ! عاشت المملكة العلوية ! عاشت الأمة !”…من جيعتو العلامة “شارل أندريه جوليان” لاحظ هو الآخر كتبات حائطية على جدران المدينة بحال: “نريد أن نكون مغاربة مستقلين ! نرفض الحماية ! نحن أبناء الأمة ! عاشت الأمة المغربية ! المغرب يطالب بالاستقلال إن شاء الله !”…
إلى جانب هاذ العامل ديال “إمارة المؤمنين” للي وظفها السلطان والموالين ليه من “الحركة القومية”، كاين عامل آخر لا يقل أهمية عنه، وهو المرتبط مباشرة بالعمل السياسي المعارض للي لعبو السلطان محمد بن يوسف بنفسو بصفته الشخصية والمؤسسية..