السْفينَةْ مْشاتْ

صاحَبْتْ لْبْحَرْ وبْما فِيَّ غْنِّيتْ
وشْكيتْ لْصْخورو ما خْفاتْ دْخالي
مْعَ كُلْ موجَةْ ضْرَبْتْ ووَلِّيتْ
وشْكيتْ للرَّمْلَةْ حْتَّى بْكاتْ لْحالي
***
البارَحْ فْحُلْمْ جْميلْ شْفْتَكْ ياسيدي
طالَعْ كيفْ شَمْسْ الصْباحْ
لكنْ ما خْذيتْ كْثيرْ مَنْ وَقْتَكْ
خْيالْ لاحْ بْكَلْماتْ مْخالْفَةْ وراحْ
اللَّه عْليكْ وْجَهْ فْعَزْ اللِّيلْ جاني
حَوَّمْ عْلَيَّ هُوَّ ولْفْجََرْ سْتورْ
رْمى إيزارْ مَنْ بَرْدو وخَبَّاني
وخْلَّى اللَّوْعَة فِيَّ بالنَّارْ تْفورْ
جاتْ صورْتَكْ ثاني مَكْمولَةْ ياسيدي
وجْهَك نهار فْلِيلْ الدنيا مَرْسولْ
الكلمة نورْ بالحق مَغْسولَةْ
هِبَة رَبَّانِية حارَتْ مْعاها لْعْقولْ
سْفينَةْ القول رْكَبْتْ وْبِيَّا مْشاتْ
ذنوبي مْعايَ تكاثروا مَيْلوها ومالو
مَحْبوسَة الصَّرْخَةْ قَوْلوني و قالو
خْباري رْحَّالَة فْكُلْ جِهاتْ
و سْكاكَنْ الوَجْدْ فْيَّ جالو
وتْعَلاتْ صورَتك نورانية يا الشَّافَعْ
وتْمَسحات من القلب كُلْ الصوراتْ
***
صاحَبْتْ لْبْحَرْ وبْما فِيَّ غْنَيَّتْ
وشْكيتْ لْصْخورو ما خْفاتْ دْخالي
مْعَ كُلْ موجَةْ ضْرَبْتْ ووَلِّيتْ
وشْكيتْ للرَّمْلَةْ حْتَّى بْكاتْ لْحالي
وصْحاتْ لعقولْ وأَنا عَقْلي مْهَوَّل
مْشى بْيَّ ليْالي فْكُلْ حَزَّةْ مْشْوارْ
يا ريتْني فالهْوى كَنْتْ اللَّولْ
ويا ريتْني للجايِّين ما جَبْتْ لعارْ
وهاأَنا اليومْ خْطايَ فالعْمَر مَحْسوبَةْ
عَوْدْ الشَّبابْ رْماني سار وخَلاَّني
قْصْتي فْكْتابْ المُذْنِبين ضْحات مَكْتوبَة
فْحْروفَها قْرا ذَنْبَك وحْدكْ ونْساني...
***
رْماتْني مَّاجَكْ يا ذنوبي
وبَحْرَكْ بي ضاقْ
لْظُلْمَة خْيامْها بْالنّْهارْ مْرْخِيَّةْ
عَمْتْ ودْموعي مْلْيانَةْ لْحْداقْ
فْريدْ رْكَبْتَكْ أيا بْحَرْ والرِّيحْ عْصِيَّةْ
وشْرَبْتْ مَنْ كاسْ لْأَوْهامْ جَرْعاتْ
زادتْني لِيَّامْ كيسانْ وكانَتْ سْخِيَّةْ
حْتَّى فاضَتْ مْنِّي مْرورْتْها وطَلْعاتْ
وتْعاشْرتْ فِيَّ لْبْلاوي مَنْ كُلْ لَوْنْ سْمِيَّةْ
***
رَكَّبْني شيطاني عَوْدْ بْلا لْجامْ
ودَّاني لْحَرْبْ ما لِيَّ فيها وْزيعَةْ
جَرَّبْتْ نْغَنِّي لو يْرَجْعني بْسْلامْ
طَوَّفْني بُلْدانْ كُلْها خْديعَةْ
ها أنا اليومْ فْشْباَكْ البارَحْ مَرْمي
التوبة هَمِّي والمعاصيْ عْلِيَّ تْلَمُّو
بالنْهارْ نْعْطي عْكَّازي لْذَنبْ مْعْمي
يْجينِي بْاللِّيلْ هايِمْ هُوَّ و ْوَلْدْ عَمُّو.
***
و فْكُلْ لَحْظَةْ عَقْلي سارَحْ
يْعَلِّي و لْسَّمَواتْ العالية يْتَبْعوهْ بالقيلْ
حالي حال الشَّمْسْ تْطْلَعْ كُلْ صْباحْ
والطيرْ يْصدحْ غَنَّاي فْعَزْ الرْبيعْ
أَ مالْكي أَنا قْدَّامْ بابَكْ جايِبْ لْمْداحْ
أمالكْ حالي رْحَمْ راني ببابك يافَتَّاح
وْكلامي رْسولْ على عَوْدْ سْريعْ
راني فْظلالك ونورانَك
والعَبْد عند ظَنُّو بيك فْقَلْبْ الرَّحْمَةْ بْلا تَوديعْ...