زجل...سلطان لسواق

يا سلطان لسواق
ما قدرت ندخل سوقي
نداري ونكتم
ها? الشوگ لمخبي فشوني
رحيلك خلخل دواخل
وخلا غصة فحلوقي
كنت جار وليف
وربيع منور بلا خريف
لوانو زاهية
شموسو باهية
من واهلي سنين
وانت ساكن فغموق ذاتي
وليعة لفراق
ضربانة مغروسة فلهاتي
من بدية خلوقي
فيك شربت ورويت
من شلا سواگي
وخا اليوم جفلات وجفت
باقية جارية فعروقي
حتى نگول نسيت
وكلما نمر علرسام
نذكر يام ما تبالا
عشناها مثل لحلام
نجومها فسما تتلالا
في زمان لغيوم وظلام
شي جاتو دعوة مولاه
شي في الركنة النسيان طواه
فين خليفة مول الضحك الصافي
فين قربال صاحب نظام لمتاوي
لمسيح وخيالو فراجة بميازن
دق لعصي مساوي
الرحالية جدبة وعيطات بسواكن حناني
گناوة سيرة لعذاب ولحديد
ترويها قراقب ونغام سنتير شجاني
- 2 -
رباعة الحوزي حركة بلا خيول
صهيلها فوداني
المداحة قصايد ذهبية بصوت خشوع
فمدح رسول بكاني
فين هداوة ولمجاديب سلاطن لكلام رباعي
اولاد حمادوموسى طيور بلا جناوح
طايرة تغرد فوق لغصاني
مول السيرة حكايات تفتن لعقول
من عيون دخاير لكتوب سقاني
شحال گدني ما نعد ونوصف
شلا زهار
شلا محار
ما يلگطها غير ملوك لسرار
وهكذا جرى وصار
گالو البنت كلات مها
السوق حكامو المنفى
بعد الصولة والزهوة
ترميتي رمية لعدى
وكانت مشية بلا رجعة
مكانك ولى خالي
وخا لحجر ولحيوط سكناتك
خالي مخلي
حيت الگسدة بلا روح
ما تساوي والي
حيت الگسدة بلا روح
دالية وعنبها لاوي
وحق لوفا
والحب الصافي بلا كدر
أيا سوق فضالة
أنا ما نسيتك
أنا ما نسيتك