عندي عندك:

بصَّحْ، لاحْقّاش اللي كْيْشدّْها من تحتْ الدّفّْ، أي مَنْ تحتْ الميدة، كيْحسّ بواحْدْ النشْوة نفسية كبيرة بزّاف. هي نشْبة، فخّْ، صنّارة فوقْ راسْها طعمْ فيساعْ كَيْسَرْطوهْ الملْهوطينْ اللي ما عندهم ضمير، الجيعانينْ، اللي كيقلّْبو علْ هامزاتْ باشْ مّا كانْ، حتّى بالطّرق والوسائل الدنيئة.
كاي?ولو الرّشوة كادّير الطريق حتّى ولو كانتْ فْ البحْرْ، ومن بعد؟ علاه البحر ما فيهشْ لمّاج واعرة؟ ويلا لفلوسْ كادير الطريق فْ البحَر راهْ كادّيرها حتى فْ البرّْ. في المغرب لا تستغرب، كلّ شيء ممكن، فينْ مّا مشيتي ما كاين غير الرشوة سخونة. هاكْ وارا، عندي عندك بلغة القمّارة اصحابْ العيطة: فْ السّْبيطاراتْ، فْ ليدارتْ، في المحاكم، فْ البيع والشرا، ديال الديور (لونوارْ)، عند البوكاراتْ، عند السمسارة، السّم سار، واخّا دارو هاذْ الهيئة المركزية باشْ يحاربوها. الرشوة بحالْ العافية، لا ماحدها تقاقي وهي كاتزيد ف البيض. بزّاف ديال سميّات اللي عطاوْ المغاربة لهادْ الرّشوة: القهوة، دهنْ السّيرْ يسيرْ، لحلاوة، آرا برّاعْ، اللّصّاقة، ال?رمومة، الخ. الرشوة واحدْ المَرْضْ نفسي خبيث كيتْصابو به الملهوطين اللّي مراض بطاعون المال. لا فرق عندهم بين هذا وذاك، بين هذه وتلك. كلّْ المعاملات التجارية والإدارية غادية بها، هي تراتبية. الحوت لكبير كياكلْ الحوت الصغير، وهذا كايكلْ صغر منّو، وفينْ غاديين؟ ما بقاتشْ الرشوة ولاّتْ احتيالا ، ابتزازا بالعلاّلي، هي أن تفهم راسكْ بالخفّ ولاّ هزّكْ الما!
آجي، منين جاو لفلوسْ لْداكْ خيّْنا؟ ياكْ كانْ غيرْ حازقْ ما عندو باشْ حتّى يتعشّى ولا ينقّي سنانو؟ باز آسيدي، فيساعْ دار الفيلاّ والكاطْ كاطْ. فهادْ المغربْ، شي عطاتو وشي زْوَاتُو، وْها المغاربة كلّهمْ مزيّْرينْ، مكويين بالنّار، نارْ الرّشوة.
آجي آلْخاوا، كُنْ خفيفْ ظريف، فْهَمْ راسْك آلبريقْ. ما بْغيتيشْ؟ وارْجَعْ غدّا، يالله سر بينا، راه الشّاف كيتسنّى، وسير بينا آصاحبي، إمْتا ناوي تفهم؟ إمتا ناوي تزعم؟ ازْعمْ باش تغنمْ، ما كاين غير سير واجي، واش ليوم، لا غدّا، هانا جيت، مزيان، جبتي معاكْ اللّعاقة؟ ها هي، آه، ونْتَ دابا زوين، ياللّهْ، آرا نشوفْ أصاحبي؟ واخّا من بعد نتلاقاو وفديك القهوة ولا فْداكْ البار، واخّا، فْ العشية. تْشَاوْ.
ولكن الرشوة ماشي هي الرّشوة فحدّْ ذاتها، هي الشّناقة اللّي كيدخلو بين الجلد والعظْمْ. ثم كاي?ولو ما كاينشْ دخان بلا نارْ، بصّحْ، احْنا ما علينا غير نْطفيوْ هادْ النار قبل ما تشعل فينا أو في مجْمَرْ الدولة، وراه شاعلة نيتْ شحالْ هادي. حتى لينْ أوحْنا ساكتينْ؟ أنتَ، أنا، هو، هي، همْ، هنّ، وهَادوكْ، باراكا من الصّمْت، فضْحُو الرّاشي والمرتشي، ما حادّْكمْ كدّهنو السّير وانتُومَا كتزيدو النارْ فْ التبنْ. التّبَن هو المجتمع، والنار هي الرّشْوَة، وفينْ غاديينْ؟ وعيقْ آلبريقْ.