عداوي 13 : ديرو قضية

إو دنيا واش من دنيا...
وجاه لاخر من اللور أو مارك البيت. أو اصبح هداف الدولة ميسي عفوا مرسي... أودي كميسي كمرسي الله يرزق ع الصحة والسلامة: بجوج هدّافه.. الفرق بيناتهم أن ميسي كيماركي البيت كتهز الجماهير... أو مرسي تا تهز الجماهير عاد مارك البيت.
أولا يرزق ع الصحة والسلامة شي نهار يهزو الما..
إيه الما ... تخيلو معاي الما...
كاس تاع الما يرد الحياة إلا وحلت ليك، أو سطل ديال الماء ينظف ليك حويجك أو عومك أو يطهرك...
وشلا ما يقدر يغرقك... بانيو يعومك. أو بسين يغرقك...
سبحان الله.. نقطة الماء تحيي الأرض أو جغمة ترد الروح أو واد أولا بحر يدي الروح...
كلشي كيحمل بذرة التناقض فيه...
الهم إلا اقوى كيضحك...
شمعة كتضوي... أو تحرك النوادر...
سكته كتنجي.. أو كثرة الكلام تدخل الحبس أو تقطع الراس...
إيه تقطع الراس.
معرفت علاش حنا العرب بالخصوص عندنا مشكل مع الراس...
جميع الحكايات أو الأمثلة فيها قطيع الراس.
-القصارا ما دوزها ولو بقطيع الراس...
-كال السلطان اللي ما فك لي هاذ الحلم نقطع ليه راسو.
-واحد البرلماني معروف فالبلاد بالفصاحة والبلاغة وكيجول فالعالم داعية أسلامي.. كان فواحد التجمع فالبلدية أو كانوا الطلبة المعطلين دخلوا في احتجاج مع وزير كان حاضر... المهم خونا الداعية كال للمعطلين ...
-شوفوا إلا لقيتوا شواحد من الوزراء اللي معانا كيملك شي كريمة أولا فيلا أنا نعطيكم راسي قطعوه !
-أو سمعتو شي وزير من الحكومة خدّم ولدو أو بنتو أنا قطعوا لي راسي في ساحة عمومية...
الله ياسي:
وتا راعي راك كتنتامي لحزب إسلامي، وجميع التيارات الإسلامية منعوتة بالإرهابيين والظلاميين وبالرجعيين. أو ما بان ليك ع قطيع الراس. وكول ع ضربوني، سلخوني، سبوني..
-تا بارك قطعوا لي راسي... تا وزن...
علاه حنا كنقطعوا الريوس ما نا حنا القاعدة...
آه المخيال الشعبي.. حكايات الجدات إوا ما فيها باس.
حتى حنا آسيدي إلا ما عجبتكش حتى حاجة فهذا النص الساخر.. اقطع لينا (....) المهم ما عندنا غرض أنا ع داوي... أو ما باغين ع الخير للجميع، أو بلادنا تزيد الكدام وأملنا فالغد كبير.
الأمل فالغد .. تأملوا معاي مزيان أو ماتديوش علي أنا ع داوي أو هذا هو اتفاقنا من الأول.
كلام يجبد كلام هضرة تجبد هضرة حثيث أو مسرح...
الأمل في الغد:
إو زوينة هدي اللي جا يكول ليك الأمل في الغد، الشباب رجال الغد كلشي الغد واليوم آش فيه...
-دابا ما كاين والو.. أتوما عارفين الأزمة العالمية.. والجفاف وزيد أو زيد. والحكومات السابقة مادارتش خدمتها.
- إو أش المعمول؟
إو الأمل فالغد فهمت إنه لا ييأس من روح الله إلا القوم الكافرون افهمت ولا يأس مع الحياة ولاحياة مع اليأس أفهمت .. إن غدا لناظره لقريب فهمت...
إو الشباب تبارك الله مازال عندو الأمل أو مازال يصبر معنا غدا إن شاء الله غد يكون أحسن من اليوم...
- والتا اليوم بعد فيناه. راه ما شافين والو...
واش كاين شغدا بلا اليوم وكاين شي يوم بلا لبارح.
-إو هاد الشي ما كان فهمت، الأمل في الله أو فالغد فهمت
-صافي ع فالله أولا فالغد؟
أو ديرو قاضية فهمت نوضوا جمعوا حوايجكم فهمت أو سيروا فحالكم فهمت وتا لغدا إنشاع الله أو رجعوا إحنا نتساناوكم ما عندنا ما يدار فهمت.
راه الشباب فهمت إلا بقى تا لغدا فهمت غدي يولي كهل فهمت أو ما غديش يخدم فهمت ولا ما خدمش فهمت ما غديش يتزوج فهمت أو ما غديش يفتح بيت فهمت أو يقدر يكعى فهمت أو ينحرف فهمت وولي بزناز فهمت أولا شمكار فهمت أولا قتال كع فهمت. أو غدي يعمروا الحباسات فهمت، أو ما نجبرو ما نديرو فهمت أو تقدر تنوض فهمت أو تشعل فهمت أو ما نقدروش نطفيوها فهمت ....