دبابيس

سرقة باراج!
قال ليك آسيدي هاذو واحد المجموعة ديال المنحرفين، عندهم سيارة، وفالسيارة واحد المجموعة ديال السيوف طوال، شافو البوليس وقيل ما داوهاش فيهم، وما بغاوش يشدوهم، وهما يمشو لواحد البراج ديال البوليس وهما يهجمو على رجال الأمن اللي كانوا تم بالسيوف ديالهم وسرقوا لواحد فيهم جهاز «التولكي وولكي».
إيوا الرسالة ديال هذا المنحرفين راها واضحة، تقول للأمن بماضي السيف: إيوا غير تشدونا واللانهجموكم، لكن حتى بعض رجال الأمن، الله يهديهم، عزيزة عليهم البراجات واخا تبقى السيبة غير حداهم فالدريبة!
الحكومة تسطي
وسطات تداوي!
الحكومة ديالنا، أو حكومة زيد، زيد، وما نايضش ما نايضش غير زيد لحمل عليه، تتزيد فكلشي، وقالك باغا تزيد حتى فالسردين اللي معلب مسكين، وباغا تزيد حتى فالملحة. و قيل باغا تولي حكومة لاسر ، لا سردين و لا ملحة عليها.
لكن يبدو أن واحد الوزير فهذا الحكومة كان فحالة شرود، او بغا يكون حالة استثناء داخل الحكومة. وهو يقرر ما يزيدش، بل قرر ينقص، وهو ينقص من الثمن ديال الوجبة ديال المطعم ديال الجامعة ديال السطات (اللي بغى يقرا هذا التكرارديال ديال، ريال ريال يقراه، ماشي مشكل) كان الثمن هو زوج دراهم، و لي درهم و 40 فرنك.
وطبعا هذا التخفيض أو الصولد ديال 12 صولدي من الوجبة، تمت غير فالسطات، وماشي فباقي الاحياء الجامعية وهذا بكل تأكيد تمييز بين الطلبة الجامعيين والطلبة الاحرار باش يقادوهم مع طلبة جامعة سطات!
والى كانت الحكومة غير تتزيد، فالسي الداودي حتى الى بغى ينقص، ايوا يخصو يزيد ينقص.. لكل الطلبة القاطنين فالاحياء الجامعية
تمرين في الشكل والإعراب بالدارجة المغربية!
مشكل لي الكلام اللي غادي يجي من بعد، ودرجها (بدل اعربها) تدريج مكلظم
اطلع تاكل الكرموس آ المعطي
التدريج:
اطلع: اديال د لأمر مصفر بالدوارة
تاكل: اديال ادابا مصفر بالدوارة
الكرموس: مديور بيه مصفر حتى هو بالدوارة
ا: حريف العيطة
المعطي: هو المعيطين عليه وهو الداير ديال الديار »تاكل«