يمكن القضية فيها فلوس صحيحة.. قضاة من المجلس الأعلى للحسابات جايين ثاني لجامعة سطات وسط حالة ديال الترقب والارتباك والقلق

عاد مشات المفتشية العامة ديال وزارة التعليم العالي والبحث العلمي والابتكار لي صيفطها عبد اللطيف الميراوي باش تحقق فعدد من التلاعبات لي كاينة فجامعة الحسن الأول فسطات، خصوصا فكلية العلوم القانونية والسياسية لي خرجات من فضايح "الجنس مقابل النقط" و"المال مقابل النقط "، إلى قضية واحد مستافد من لابورس واخا مبقاش طالب، بالإضافة لفضايح الامتحانات لي مكتساليش، هاهي نزلة أخرى ديال المجلس الأعلى للحسابات لهاد الجامعة عاود ثاني.
وأكدات مصادر "گود" أن زينب العدوي قررات ترسل القضاة ديالها السيمانة جاية باش يبداو يحققو ففلوس صحيحة ديال لي بوند كوموند وغيرها.
وعلى حساب شهود عيان من داخل الجامعة، فإن رئيس الجامعة بان هاد الأسبوع مقلق وطالع ليه الدم ومافاهمش كيفاش ولايتو بادية هكا، ومبرزط أيضا، خصوصا وأن كاين هضرة على تفتيش غادي يكون فجامعة عبد المالك السعدي لي كان هو عميد فيها.
فهاد السياق مصدر "گود" وضح أن الرئيس ديال الجامعة عيط على أعضاء مجلس الجامعة واخبرهم أنه غادي يعقد مجلس استثنائي الثلاثاء الجاي واللي مزال نقاط جدول أعمالو حتى لدابا ما بايناش.
بالإضافة لهاد الشي، مصدر "گود" قال بللي كاين احتقان داخل الجامعة بمختلف مؤسساتها بسب تعطال ديال پريمات وميزانية المؤسسات بلا حتى شي سبب.