فضيحة فكلية العلوم عين السبع.. 400 صفر فإمتحان ديال طلبة هاد العام خصهم ياخذو الاجازة.. وادارة الكلية سدات التعاليق ففايسبوك باش حتى واحد مايعبر على الرأي ديالو

كشفات مصادر "كود " بأن روينة نابضة فكلية العلوم القانونية والاقتصادية والاجتماعية فعين السبع، بسباب العشوائية لكتعرفها هاد الكلية ومعها رئاسة الجامعة كاملة لي مزال لدابا ما داروش ليها رئيس، هاد الكلية لي دارت شلاضة مني بغات ترجع الناس من الباشلر للاجازة من بعد ما لغاه عبد اللطيف الميراوي وزير التعليم العالي والبحث العلمي والابتكار، بحيث لقى الطلبة روسعم ڤاليداو مواد وغادين يعاودها وسط هاد العبث لي ولا ضارب مؤسسات التعليم العالي.
الفضيحة الكبيرة هي أن أستاذ جامعي كيقري مادة Recherche opérationnelle ديال السداسية 6 يعني العام الثالث يعني السوميستر لي غيتخرجو فيها الناس وياخذو إجازات، في الإمتحان ديال هاد المادة كيف كيقول الاستاذ وفق رسالة منو للادارة ولي اطلعات "گود" عليها كيتفاجأ بأن 400 طالب وطالبة حطو الوراق بيضين بمعناه كلهم غادي ياخذو زيروات، واش هاد الشي طريقة جديدة ديال الاحتجاج ولا غير بنادم ما قاري تا وزة بسبب القرارات العشوائية.
وزيد على هاد الشي كامل مني تلغى الباشلور، إدارة كلية عين السبع سدات خاصية التعاليق فصفحتها على فايسبوك فوجه الطلبة باش ميحتجوش علما ان هاد الشي دار ارتباك عند الناس.
بزاف ديال الطلبة هضرو مع "گود" فهاد المواضيع، وأكدو ان امتحانات الدورة الاستدراكية غادي تكون بداية من 20 فهاد الشهر ولكن مكاين لا استعمال زمن باش يعرفو ساعات الامتحان والمواد والاكثر من هاد الشي كامل كاين مواد لي مزال لدابا متأفيشاو الريزيلطا ديالهم واخا الراطراباج قرب بقات ليه غا سيمانة.