تيار مراكش باغي يطوي الصفحة ديال الأمين العام قبل المؤتمر.. الكسايد لي دار كلفات البام سياسيا واجتماع فكازا بحضور المنصوري: مرحلة وهبي سالات وخاص مؤتمر الطلاق معه

عبد اللطيف وهبي، الأمين العام لحزب الأصالة والمعاصرة، فقد "الهيبة" ديال الزعيم السياسي وتنحا قبل الوقت، فحسب مصادر "كود" فإن قادة البام كاعيين بزاف منو ورافضين يزيد يعطي تصريحات ولا يدير خرجات إعلامية.
وهبي دبا ضربها بالسكات، فرضات عليه قيادة الحزب ميهضرش، بحيث الحزب حاليا تحت إشراف وتدبير تيار مراكش اللي كيقودو الثلاثي (فاطمة الزهراء المنصوري، سمير كودار، احمد اخشيشن).
وفهاد السياق، قالت مصادر حزبية ل"كود" بأن اجتماعات مكثفة تدارت للاستعداد لمرحلة ما بعد وهبي، بحيث دار اجتماع فكازا بحضور فاطمة الزهراء المنصوري، مع المنسق الجهوي للحزب بجهة الدار البيضاء سطات، أكدوا فيه الباميين على أن "مرحلة وهبي سالات"، وبلي خاص الاستعداد لمؤتمر استثنائي باش يطويو الصفحة ديال وهبي.
قيادات البام كانت هضرات على استعدادات مبكرة للمؤتمر العادي لي غايكون ف7 فبراير 2024 كحد أقصي (يعني ممكن يديروه قبل)، هضرت عليه فسياق هاد الحرب لي دايرين ضد وهبي. واش هي إشارات مبكرة له باش يفهم راسو؟.
مصدر قيادي نفى يكون هادشي تقال فشي لقاء، في حديثه مع "كود"، ولكن مصدر آخر أكد داكشي.
"كود" اتصلت بالمنسق الجهوي للبام فكازا، تلفون كيصوني ولا مجيب، وخلينا ليه مساج.
القصة بدات من نهار دار المكتب السياسي لقاء مع عدد من الصحافيين، "كود" حضرت فيه وشافت الانقسام الداخلي باين. شي مع وهبي وشي ضدو. طبعا لي ضد وهبي هوما تيار مراكش مصطفين ضد أمينهم العام.
اللقاء الصحافي لي دار المكتب السياسي للبام مع الصحافة يوم 31 يناير 2023، كانت فيه الكلمة الأولى لفاطمة الزهراء المنصوري، رئيسة المجلس الوطني للحزب، لي عبرات عن طموحاتها الكبيرة باش تكون قائدة للمشروع (هنا ما مقصداتش واش تكون رئيسة الحكومة ف2026 ولا غاتكون فقط أمينة عامة للحزب).
فهاد اللقاء، هبط وهبي للتحت ومشا بحالو ومعه محمد الحموتي، واحد من الملايرية لي ساهمو فصعود وهبي، واللي باقي مزال مجاوبش على قضية "اختفاء 4 ملايير من ميزانية البام"، فالمقابل بقا العربي المحرشي مع المنصوري وكودار والمهدي بنسعيد الفوق باش يعطيو تصريحات للصحافة.
المنصوري لي قالت فجوابها على سؤال "كود": "واش البام كيسيروه جوج ريوس، واحد فمراكش والثاني فالرباط؟؟"، (قالت) :"حزبنا معندوش جوج ريوس، عندو فوق 400 راس اي مناضل عندو قيمة وكنرفضو التدبير الفردي".
المنصوري دبا شدات زمام الأمور، وهبي رجع اللور. ساكت. واش "فرضو عليه يسكت"؟.
وهبي وزير دخل فمعارك وشبوقات جبدات عليه صداع ومشاكل، ولكن أخطر معركة عاشها هي ديال امتحان المحاماة، اللي كانت محط شكوك وشبهات واحتجاجات والقضية راها فالمحاكم الإدارية.