فضيحة دوزيم فاستراليا.. خاص النفس تضرب ناس القناة باراكا من الذل. جابت رباعة منتاحلين صفة وشافرين كونسيبت ومادين 300 مليون وفري لانس ما مخلصينش شهورا هادي وصحافيين القناة مكرفصين

اجيو تعرفو قصة سعد عابد اللي القناة الثانية رسلاتو مع شي "غير مؤثرين" لأستراليا، من بعد ما نصب على القناة الثانية في كاس العالم قطر 2022.
القناة اللي كتخلص من فلوس دافعي الضرائب.
اكيد كلشي شاف واحد الفيديو يتيم ديال هاد الشخص في قطر ملي صور راسو مع الرباعة ديالو في قطر كيجمع الزبل من بعد ماتش المغرب وكرواتيا، هاد الفيديو البليد اللي كان الهدف منو فقط الشو طلع على المغاربة بغسيل الفندق. كيفاش؟
سعد عابد جمع واحد القشلة ديال المرتزقة ومشى ببرنامج مسروق بالحرف من قناة ميدي 1. حتى من الملف بدل فيه فقط الصور والاسماء وخلاه كيفما هو وخدا هو والمرتزقة اللي جمع 25 مليون سنتيم باش يمشي يتفجج في قطر على ظهر القناة الثانية اللي كانو كيخسرو عليها فيديوهات مصورة اغلبها بالبورطابل.
هاد سعد السعود اللي ولا صحفي ومدون ومرشد سياحي مزور، من بعد ما سرق فكرة البرنامج وتفاصيل التفاصيل ديال البرنامج من قناة ميدي 1. سافر على حساب القناة الثانية مع رباعة ديال صحابو في الوقت اللي القناة رسلات طاقم من ثلاثة اشخاص فقط باش يديرو التغطية لحدث كبير وكبير بزاف فحال كاس العالم وهاد الطاقم بطبيعة الحال ما طلعش على دافعي الضرائب بقيمة برطمة في السكن الاقتصادي!
من بعد ما خداو هاد 25 مليون للشخص باش يتفرجو في المنتخب ويزهاو في قطر عطاوها للسياحة والعمرة اللي بطبيعة الحال بفلوس دافعي الضرائب وبقاو مرة مرة كيرسلو شي فيديوهات بليدة باش دوز في القناة الثانية واللي ما شافهم حد.
سعد اللي ولا كسوق لراسو باللي جاي من الفوق وانه مشى لمناورات الاسد الافريقي حيث مدعوم من الفوق والحقيقة انه فقط تلاقى فشي فطور مع القنصل الامريكي فكازا وبقى كيتلصق عليه حتى ولا كيوهم شي وحدين انه بوحدو مضوي لبلاد.
دابا خارجة شي هضرة باللي القناة الثانية ما عطاتوش فلوس في استراليا، مزيان اسيدي جاوبونا غير على قرابة 300 مليون اللي دا باطل في قطر واشنو هاد الخدمة اللي دار ؟ وكيفاش القناة الثانية كانت كتطلب وترغب باش يجيو مستشهرين فدوك الكبسولات البليدة اللي كان كيرسل هو ورباعتو ؟ وكيفاش القناة الثانية قبلات برنامج مسروق بالحرف حتى من ملف البرنامج مسروق بكل هذافيره ؟