المنطقة بين تارودانت ومراكش سنوات وهي منسية مهمشة وصعب الولوج ليها وطريقها مدگدگة وللأسف كان خاص زلزال باش يشوفوها المغاربة على حقيقتها ديور ديال التراب معزولين في راس الجبل

الله يرحم ضحايا زلزال الحوز وتعازينا الحارة ليهم، هاد المنطقة منكوبة حاليا وحدة من أجمل مناطق المغرب وناسها من أفضل الخلق، الطيبوبة والكرم والنقى والصبر والقناعة والانفتاح والنشاط، ومهد وحدة من اعظم الامبراطوريات في التاريخ الدولة الموحدية بناة الحضارة وحكام الضفتين، تدمرات حاليا كلها بسباب الزلزال، وطبعا حات غير في الدراوش والبسطاء، ولكن قبل من هادشي هاد المنطقة راه كانت شبه منفية ومعزولة وطرقناها مكرفصين واخا قدام ورئيسيين الطريق بين مراكش وتارودانت راه طريق قديمة وتاريخية ومع ذلك مكرفصة بالمزيان.
هادي عام ونص تقريبا كنت زرت المنطقة آسني و ويرگان،، ايجوكاك وطلعت حتى اتيزي نتاست وقبل منها طلعت لواحد الدوار سميتو أكينان فاش كتوصل لويرغان كتلقى دورة لأمزميز وقبالتها طلعة كتدوز على وطيلات في المنطقة وكتطلع شي تلاتين كلم غير وسط الجبال ، طزيق رائعة وكانت عاد تصوبات هزيت معايا واحد المرة كبيرة في الطريق وجبدنا الهدرة قاتلي عندها رونديفو في سبيطار مراكش باغا تدوز السكانير وكان خاصها تشد خطاف من راس الجبل يهبطها لويركان ومن بعد طاكسي آخر آسني ومن بعد آخر لمراكش وطاكسي صغير من المحطة للسبيطار ربعة ديال الطاكسيات بحال الى جايا من طوكيو وهي بعيدة على مراكش مكاملاش مية كلم، هاد الرحلة كانت في الظروف العادية وتخايل دابا كيدايرة الوقت بسباب الزلزال.
الطريق من مراكش لتارودانت غير كتفوت المسجد الأعظم لتينمل كتولي فير صالحة مدگدكة ضيقة ومهلوكة وفيها نقطع صغير مصلوح في راس تبزي نتاست داروه نيلو گودرون ملس غير صالح لمنطقة ديال الثلج والشتا والفيراجات كتبغي گودرون حرش، خلي عليك الدواور المنسية في راس الجبل حرفيا، راه منطقة صعيبة وبزاف سواء لإيصال المساعدات او لوصول المنقذين كاين مناطق مستحيل توصلها من غير بالمروحية، واغلب المناطق الجبلية في المغرب بحال هكاك من غير الشريط الساحلي راه القضية مهمشة ومكرفصة ودازو سنوات كثيرة وبقات الأمور كما هي عليه نتمناو تكون من إيجابيات التضامن الحالي ان الدولة تفكر داك المنطقة وعلى الأقل تقاد ليهم الطرقان وتتفكر لشي دواور انها تحولهم وتخلق تجمعات سكنية، حيت مايمكنش تدير سببطار ومدرسة لكل جوج ديور في راس شي جبل، تهميش داك المنطقة غادي يشوفوا العالم كامل حاليا وخصوصا الجهة التابعة لتازودانت هاديك مكملة گاع.