واخا الحيداوي فالحبس.. أولمبيك أسفي كيجمعو فلوس تذاكر الماتش مع الفتح لضحايا زلزال الحوز والجمهور غيشري التيكي وغيقاطع المباراة

بادرت مكونات كرة القدم فمدينة آسفي من خلال الأولمبيك والجماهير ديالو، للتعبير على تضامنهم مع ضحايا زلزال الحوز، وقررو يساهمو ماليا فالتخفيف من آثار الفاجعة.
وواخا أن محمد الحيداوي رئيس أولمبيك آسفي مشدود فالحبس بعدما تحكم عليه فقضية تذاكر مونديال قطر، فالمكتب المديري للنادي قرر يخصص مداخيل الماتش اللي غيلعب مع الفتح الرياضي هذا الويكاند ضمن الجولة 3 من البطولة الاحترافية، ويساهم بها لدعم ضحايا زلزال الحوز.
إدارة أولمبيك آسفي حددت ثمن تذاكر فمبلغ 30 درهم للمدرجات العادية ديال تيران المسيرة الخضرا فاسفي، و100 درهم للمنصة المغطاة، و2000 درهم المنصة الشرفية، وغيبدا بيع التذاكر اليوم الجمعة مع 11 الصباح، والماتش غيتلعب غدا السبت مع 7 وربع ديال لعشية.
من جهتها قررت الترا مارينز شارك، المساندة لأولمبيك آسفي أنها تنخرط فعملية شراء تذاكر ماتش الفرق مع الفتح الرياضي، ودعت الجماهير المسفيوية باش تشريها، ولكن علنت مقاطعة المباراة فالتيران، حدادا على ضحايا الزلزال واحتراما لأرواحهم ونفسية الشعب المغربي.