كيشد 3000 درهم فالشهر وشاري دار وطوموبيل وصاحبو للي كيحقو معاه عليه هضرة كثيرة.. "گود" جابت تفاصيل حصرية من قلب التحقيق مع موظف جامعي بكلية فسطات

كتواصل عناصر الشرطة القضائية بولاية أمن سطات تعميق البحث في قضية مجبود فيها الموظف (ح.ايت.م) وجوج سماسرية، واحد منهم سميتو (ح. م)، وهو اللي عليه هضرة كثيرة واخا كيتبحث معاه فحالة سراح.
مصادر "گود" أكدات أن النيابة العامة طلبات من البوليس يحققو فكيفاش موظف كيتخلص 3000 درهم في الشهر عندو دار وطوموبيل مخلصين ناضين، فظل هضرة كدور على التبزنيس فالنقط وحويجات آخرين يشتبه تكون عند المعني بالأمر يد فيها مع مسؤول سابق وإطار حالي بكلية العلوم القانونية والسياسية، وزيد عليهم السيبة مع عميد كان عفاه الوزير الميراوي بسباب فضايح ملف "الجنس مقابل النقط".
ووفق ما توصلت إليه "كود" من معلومات بهاد الخصوص، فإن المشتبه فيه الثاني كتفيد معطيات المتوفرة بشأنه على أنه وسيط معروف كان لاصق فأستاذة، راها ماتت، وتحول من معلم متعاقد لطاشرون لموظف فعمالة النواصر، وعطاوه دكتوراه وكانو عوالين يرجعوه أستاذ جامعي.
هاد الموظف لي دبا راه كاردافي، هادي شحال من عام وهو خدام فكلية الحقوق بلا تعيين رسمي حيت هو محسوب على المدرسة الوطنية للتجارة والتسيير، وكان المدير اللي مشى عبد الصادق الصادقي وقفو مباشرة مني حلات المفتشية التحقيق فهاد القضية.