ما كاين تخليق. رحيل سياسي نظيف نبيل صادق زاهد يوم محاكمة سياسيين. كيفاش جنازة ايت يدر تكون درس للدولة اللي خرجات لينا سياسيين فاسدين وناضت اليوم كتشد فيهم بلا ما تقيس رجالاتها من عمال وولاة

اليوم الثلاث 6 فبراير 2024 صبحات صور محمد بن سعيد ايت يدر طالية الفايسبوك. كثار اللي دارو صورتو فبروفيلاتهم لتوديعو. ايت يدر توفي هاد الصباح بالمستشفى العسكري بالرباط عن 99 سنة. غدا لاربعا غيدفن بمقبرة الشهداء فالحي المحمدي بكازا.
غادية تكون جنازة كبيرة. جنازة سياسي ظل فحياتو كلها نزيه زاهد نظيف نبيل وصادق. دار السياسة سواء مع منظمة العمل الديموقراطي اللي كان زعميها او قبل او بعد٬ بنبل. ما قلب لا على مجد مادي ولا منصب سياسي ولا يجمع لملاير.
حياة هاد الباعمراني اللي تزاد فاقليم شتوكة ايت باها درس للعمل السياسي النبيل ماشي كيف سوقات ليه جهات فالدولة هادي سنوات. اللا. درس فيه همة وعفة. درس لهادو للي وصلو السياسة فالمغرب فين وصلات ليه اليوم. درس للي سمحو للفاسدين يدخلو للسياسة. سمحو للشفارة يدخلو ليها باش يبيضو مسيرتهم.
درس لهادوك اللي باغيين يوهمونا اليوم باللي كاين نوع من تخليق الحياة السياسية باعتقال ومتابعة عدد من النواب البرلمانيين وتجريد اخرين بسباب قضايا الفساد. هادو اللي تشدو كلهم عارفاهم السلطات المحلية. عارفة فسادهم ومع ذلك كاين اللي تدعم من قبل هاد السلطات باش يوصل للبرلمان او الجماعة. هاد لشي ماشي قصر على رجال السياسة كاين حتى فرجال اعمال.
اليوم غادي يتقدم كريمين رئيس المجلس البلدي لبوزنيقة سابقا مع باطرون الزبل البدراوي مول "امازون" اللي كان رئيس الرجا. بجوجهم صورة لواقع المال والسياسة فالمغرب اليوم. بحال ايلى ايت يدر ختار يرحل من عالم غادي ويتزاد فساد. نهار تقديمهم =هما غير عينة= امام الوكيل العام رحل ايت يدر الشهم النبيل اللي قاوم الاستعمار وما قدرش يقاوم الفساد.
محاربة الفساد وتخليق الحياة السياسية والاقتصادية ما يمكنش يكون باعتقال منتخبين.. كاين للي مشارك معاهم فالفساد وما تشدوش. هما رجال السلطة من قياد وعمال وولاة. كيفاش ما تشد حتى واحد فيهم مع هاد الاعتقالات. بلا اعتقالهم راه ما كاين تخليق للحياة. ما كاين محاربة فساد.
بغيتو رحيل ايت يدر يكون درس للعمل السياسي النبيل٬ خاص الشطابة فجميع المجالات وبنفس الدرجة. بعدو على الانتقائية.