فزمن الاحتراف: بعد الماص للي جمعو لهم فلوس المازوط.. الجواد تكفلو بديبلاصمون مولودية وجدة للرباط

ولاو فرق القسم الاول من البطولة الإحترافية لكرة القدم عاطينها للطليب والسعاية، وهذا الشي فزمن الاحتراف والمشكل ان الأمر كيتعلق بأندية عريقة وعندها تاريخ فالكورة المغربية.
ومن بعد المغرب الفاسي اللي جمع لهم جمهورهم فلوس مازوط الكار باش ديبلاصاو لتطوان يلعبو ضد المغرب التطواني وشراو لهم الما، جات نوبة مولودية وجدة اللي غيتكفل بهم تاني واحد الشخص الاسم ديالو أحمد الكرواتي وهو رجل أعمال من ولاد وجدة، وغيتحمل مصاريف الديبلاصمون ديال الفريق للرباط باش يلعبو ضد اتحاد التواركة الاحد الجاي وغيعرض على اللاعبين للعشا ملي يوصلو للرباط.
وهادي هي المرة الثانية اللي كيتدخل فيها شي واحد باش يدير المزيان مع مولودية وجدة فالديبلاصمون، حيث المرة اللي فاتت كان واحد الشخص هو اللي تكلف بمصاريف تنقل الفريق إلى برشيد باش يلعبو ضد الرجاء الرياضي، وهذا الشي كيطرح علامات استفهام كبيرة على دور المسؤولين فهاد الاندية وتحملهم للمسؤولية فزمن الاحتراف إذا كانوا غيبقاو يتسناو مبادرات ديال أشخاص باش يصرفو على النادي.