كيفاش مذهب فقهي قديم كيضرب العلم. راه عار عندنا لا دي ان وباقيين واحلين مه اتبات النسب وخدامين "الولد للفراش والعاهر للحجر"

من العيب أنه تكون دولة تسعى جاهدة للحاق بركب الحضارة ومع ذلك تكون التشريعات ديالها باقا كتعتامد على نصوص ما قبل القرون الوسطى ، وحتى فمدونة الأسرة لي كانت بارقة أمل لإنصاف المرأة ، وكثرات عليها الهدرة ، وهي حقا في عدة نصوص أنصفت المرأة ، غير هي باقا معتامدة على الأسس الفقهية المالكية ولي فالغالب ديالها سريالية واحد الشوية خصوصا فيما يتعلق بإثبات النسب ، لي نايضة عليه ضجة مؤخرا فالمغرب ، فمن بعد الحكم لي كان صدر من إبتداية طنجة ولي تبعو فيه العيلم وتحليل الحمض النووي و تم اتباث نسب طفل لأبيه البيولوجي ، هاهو حكم الإستئناف رجع بينا للقرون الوسطى ولقاعدة " للولد الفراش وللعاهر الحجر"، وكيلغي الحكم الإبتدائي وكيضرب العلم والحمض النووي مع الحيط ويتبع هرطقات الفقهية حول ثبوت النسب لي تدارو أيام الجاهلية الحضارية .
فمن بعد مافرحنا بهاد الحكم ، وقلنا أخيرا كاين قضاة منطقيين غيديرو ثورة على مثل هاد التشريعات البالية ، وقلنا أنها غير الخطوة الأولى أمام مجموعة من الأحكام لي غادي تولي تصدر على المحاكم المغربية ولي غادي يتم فيها الإعتماد على العلم والمنطق ، عوض هلوسات فقهاء الدين ، هاهي محكمة الإستئناف كترسخ الإنتكاسة القانونية لي كنعيشو بمثل هاد الحكم ، إييه هو قانونيا صحيح ، ولكن راه العالم كامل دابا كيعتابر تحليل الحمض النووي أكثر الحلول ثورية فالعصر الحديث ولي بسبابو تم اعادة النظر فالعديد من الأحكام ، وبيه كيشدو العديد من المجرمين ، ومع ذلك كتجي حتى للمغرب و ف2017 وكيتم ضربه في عرض الحائط ، فمقابل مذهب فقهي أكل الدهر عليه وشرب وتكرع.
الإمام مالك لي متابعين المذهب ديالو حنا ، راه بالنسبة ليه المرة الى طلقات ودازت خمس سنوات من بعد الطلاق وولدات فراه الإبن ينتسب لطليقها ، وحتى فالقانون المغربي دايرين عام من بعد الطلاق كأقصى مدة للحمل ، وحاليا العالم كامل عارف أن مدة الحمل تسعة أشهر ، ومع ذلك هاحنا فالقانون باقين تابعين نص فقهي مجانب للعلم ، وباغين نزيدو لقدام ونلتاحقو بالحضارة وحنا مقيدين بمثل هاد القوانين الفقهية ، لي كتكرس دونية المرأة وكتخلي مكانتها فالحضيض حتى بالنسبة للقانون ، دابا شنو ذنب طفل تم اثبات نسبه لأبيه بواسطة الحمض النووي ، ومع ذلك يكبر فالمجتمع كولد الزنى ويتحرم من الميراث فالأب ديالو ومن عدة حقوق أخرى ، راه غير فكولومبيا مية عام هادي باش الإبن الطبيعي كيورث وله كامل الحقوق فيه أبيه واخا بلا عقد قران ، وحنا ف 2017 باقين خدامين بالولد للفراش وللعاهر الحجر ، راه عار هادشي .