تنفرد بنشرها "كود": سلسلة "كيفاش السلاطين ديال المغرب كايشوفو "ريوسهوم" وكايشوفو السلطة ديالهوم وكايحميوها؟ تنحية سيدي محمد بن يوسف والنتائج ديالو على استقلال المغرب: 20 غشت 1953 (3)…دور الباشا التهامي لكًلاوي. ح 115

بتاريخ 20 مارس 1953، الباشا "لكًلاوي" دار واحد العريضة للي وقعها 20 قايد…هاذ العريضة كا تتاهم السلطان بالإخلال بواجباتو الدينية، وبالموالاة ديالو للأحزاب "المتطرفة غير المشروعة"، وكاتتطالب بتنحيته عن عرش المغرب واختيار سلطان جديد مؤهل للحكم والسلطنة…
هاذ الوثيقة للي فيها توقيعات ديال 250 باشا وقايد، و 6 ديال الزعماء الدينيين، و31 من الأعيان الكبار ديال البلاد، تسللماتها الإقامة العامة بتاريخ 20 ماي 1953. الباشا لكًلاوي كناطق رسمي باسم "أمة المؤمنين" عطى تصريح لوسائل الإعهلام كايقول فيه: "بأن منه مُخوًلْ باش يعطي رأيو في قدرة الإمام في تسيير شؤون الأمة بدون الرجوع للفقهاء للي هوما مجرد نواب ديالو"…وفي 31 ماي 1953، صرح من جديد رسميا لوسائل الإعلام بأن "السلطان سيدي محمد بن يوسف تنحى عن عرش المغرب" !
وتأكيدا لهاذ التصريح الرسمي، وبتاريخ 1 غشت 1953، لكًلاوي سَللًمْ للمقيم العام "كًيوم"، عريضة ثانية موققعها 330 من الأعيان الكبار ديال البلاد و5 الشيوخ ديال زوايا، وصررًحْ للصحافة بأنه: "سواء السلطان قبل أو ما قبلش شروط الإقامة العامة الفرنسية، فقرار تنحيتو عن العرش لا رجعة فيه"..
وبالرغم من أن 287 شخصية مغربية وققعات عريضة مضادة كاتضامن معا سيدي محمد بن يوسف، ورسلوها للمقيم العام،فالإقامة العامة قررات تنفيذ المخطط ديالها إلى النهاية، وفي تاريخ 13 غشت 1953، "الجينرال كًيوم" طوًقْ القصر الملكي بالعسكر، ووضع "ولي العهد مولاي الحسن" تحت تدابير الحراسة النظرية، وقددم للسلطان جميع الظهائر المتنازع في شأنها باش يعاود يوقًعْ عليها…هاذ المرة سيدي محمد بن يوسف رْضخْ للأمر الواقع ووقًع على الظهائر معا جملة ضافها هو نفسو على حاشية هاذ الظهائر كاتقول: "وقعته تحت التهديد بالقوة والضغط" !!
بتاريخ 15 غشت 1953 "لكًلاوي" جْمعْ القياد والأعيان في القصر ديالو وبايْعُو سيدي محمد بن عرفة سلطان على عرش المغرب، وما بقى لسلطات الحماية إلا أنها تجمعْ الفقهاء للي باركو هاذ البيعة رسميا وكتبوها ووقْعُوها…يوم 20 غشت 1953، يعني 5 ايام من بعد، "فيليب بونيفاص" المراقب العام ديال الشرطة في الدار البيضاء، عْطى الضوء الأخضر للتهامي لكًلاوي باش يحاصر القصر الملكي بالرجال ديالو، والجينرال "كًيوم" عْطى الأمر لسيدي محمد بن يوسف باش يتنازل على عرش المغرب..ومن بعد مفاوضات للي كان الموضوع ديالها المستقبل المادي والمعنوي ديال العائلة الملكية وشروط التنازل على العرش، قرر المقيم العام لأسباب أمنية من وجهة نظرو باش ينفي العائلة كاملة لكورسيكا، ثم من بعد لمدغشقر…للإشارة، فهاذ الشروط ديال التنازل على العرش وللي فيها مكافآت مالية وفيها المستقل الدراسي ديال ولاد وبنات السلطان محمد بن يوسف، ماكايتكللم عليها حتى شي مؤرخ مغربي، والمؤرخ الوحيد للي كايسردها بتفصيل هو العلامة شارل أندري جوليان رحمه الله…
في الغد، يعني 21 غشت 1953 للي صادف "عيد الأضحى"، الخطبة ديال العيد تقامت باسم "السلطان أمير المؤمنين سيدي محمد بن عرفة، في حين المنطقة الشمالية للي خاضعة لإسبانيا قامت خطبة العيد باسم "السلطان المنفي" ولكن للي باقي "شرعي"، بحكم أن الجينرال "فرانكو" ما عتارفش بعملية إقصاء سيدي محمد بن يوسف من العرش، وبقى متشبث بيه!