ها علاش الكويت كتدعم “الشعب الصحراوي”: خلاص زبلة بنعرفة مع هاد الدولة

سابقة هاد الموقف الكويتي المسجل اول أمس خلال التصويت على القرار الأممي الجديد رقم 2414، المتعلق بملف الصحراء نوعا من الحيرة في أوساط متتبعي النزاع. الكويت فمجلس الامن كتقول انها مع “تقرير مصير الشعب الصحراي”.
مندوب الكويت لدى الامم المتحدة مشى بعيد. الديبلوماسية المغربية ردت عبر “كود” “لاتعليق”. علاش هاد الموقف الكويتي.
اللي متبع العلاقات بين البلدين غادي يشوف انها متآزمة وانها ماشي اول مرة ديرها الكويت على قضية الصحراء.
الكويت سبق ليها ضربات المغرب فالصحراء فالدورة الثانية والأربعين لمنظمة العمل العربية في الكويت. توزع كتاب فيه شمال المغرب مقسوم على صحرائه. حينها هدد وزير التسغيل آنذاك عبد السلام الصديقي في سنة 2015، بالانسحاب. تدخلت دولة الكويت وسحبته واعتذرت عما سمته بالخطأ المطبعي. طبعا ما كانش لا خطأ مطبعي لا والو. كانت رسالة سياسية للمغرب
هاد الرسالة غادية تكون اوضح فالقمة الأفروعربية بمالابو في غينيا الإستوائية ف23 نونبر 2016. الكويت لم تنسحب من القمة بسبب مشاركة البوليساريو كما فعلت دول اخرى. واخا هي اللي كانت ترأسات الجلسة. الخارجية ديالنا اكتفت بالتعبير عن أسفها.
شكون ورطنا فهاد الازمة مع الكويت؟ واش هند عشابي سيدة الاعمال اللي كانت او مزوجة بسفير الكويت في فيينا النمساوية واللي المغرب ما تسوقش لشكاياتو وتدخلات جهات اكبر منو لسنوات حتى تم تحريك القضية في الاخير وحكم عليها ب3 سنوات سجنا؟ موحالش هاد القضية هي السباب واخا قلقات بزاف الكويت كدولة.
اللي تسبب فهاد الشي هو ابن عرفة اللي كيرآس الحكومة اليوم. باش دار بنكيران حكومتو تم تعيين العثماني وزيرا للخارجية والتعاون. هاد السيد اللي جابوه يعوضو بيه بنكيران هادي عام٬ مشى للكويت فزيارة رسمية صيف 2013. السيد خلى مهامو الديبلوماسية الرسمية وتلاقى مع قياديين مع جماعة الاخوان المسلمين بالكويت. هاد الشي فقص الدولة الكويتية. تم اعفاء سفير المغرب فهاد الدولة ولد الجينرال الراحل بناني للي كان على رآس القوات المسلحة الملكية. الاعفاء ما صلحش الجرة. السفير كان اشرف على تنظيم هاد اللقاء عقب ترؤس بنعرفة حينها لاشغال اللجنة العليا المشتركة المغربية الكويتية.
دابا لكويت باش تم اعفاء ابن عرفة من وزارة الخارجية قالت مزيان ولكن يرجعوه رئيس حكومة بعد 4 سنوات هاد الشي غادي يزيد يجعرها. المصيبة ماشي غير مع الكويت اللي زبلها. دار زبايل كثيرة للمغرب وجازاوه بمنصب ما يستحقوش باش يقتلو بنكيران سياسيا او يتوهمو انو تقتل سياسيا