كلشي على التواصل مع المقاطعين ! طالما الحكومة تواصلها فاشل و الشركات تواصلهم فاشل راه ماغاديش تتحل هاد الازمة !

كاين مشكل كبير فالتواصل فالمغرب ! و هادشي لي بينات عليه المقاطعة ! بينات بلي المؤسسات عندنا لا الحكومية و لا الخاصة ماعندهاش مع شي حاجة سميتها التواصل ! و بالرغم من انه عندنا مدارس التواصل ! و اجونصات ديال الكومينيكاسيو ! و لي طفات عليه الشمعة كاينوض يقوليك كاندير الكومينيكاسيو ! مع اول اختبار ! اول امتحان كلشي سقط و كلشي ضرب الطم ! و لي ماضربش الطم جا يكحلها عماها ابتداءا من بنكيران ديال سانطرال مرورا بالداودي ديال الحكومة و انتهاءا بالخلفي …
لي كايحل فمو كايزيد يقودها ! هادشي فكرني فديك النكتة ديال ديك البوگوصة لي صيدها واحد و مشات معاه للقهوة ! و هي ساكتة ! كايهضر معاها و هي ساكتة ! كايسولها و هي ساكتة ! طلع ليه الدم قاليها وايلي بزاف على الحشمة ! جاوبيني ! هضري معايا ! قولي شي حاجة ! هي تهز عينيها فيه و قالت ليه بواحد الابتسامة بلهاء ” خفت لانقودها” وا راك قودتيها اصلا !
زمن التواصل هادا ! مشا زمن الارتجال و جيب يا فم و قول ! دابا كلمتك بنت فمك، و مع وسائل التواصل الاجتماعي خلاو العالم كامل كايشوف العالم كامل مابقاش مسموح ليك تغلط ! و تتواصل بطريقة فجة و غليظة مع الناس … حيت ماشي فحال شحال هادي كاتسجل فستوديو و تقطع لي بغيتي و تخلي لي بغيتي ! دابا كلشي لايف ! وا تيلاوتك يقدرو يصوروها ليك لايف فشي حمام و تلقاها كاتسارا فاليوتوب بلا خبارك فحال لي وقع مؤخرا لمجموعة ديال العيالات . !
التواصل فن ! و علم ! ! عندو ادبياتو و وسائلو و الناس لي كايفهمو فيه و كايخدمو مع رؤساء الدول و المسؤولين الكبار و المرشحين للانتخابات فاعتى الديموقراطيات ! راه اللون ديال الگرافاطة كايدخل فالتواصل ! و السباط لي غاتلبس باش تمشي تهضر مع العمال ماشي هوا السباط لي غاتلبس لاكان عندك اجتماع مع مجلس الادارة ! راه اي ديطاي اليوم كايدخل فالتواصل ماشي غير الهضرة حتى الحركات و اللباس و الضحكات … كلشي محسوب ! و كلشي عندو هدف و كلشي فيه رسالة ! مايمكنش يجي ” الداودي” يبدا يتعيصب و يتجيبد و يتنيرفز فالتلفزة و يقول للناس ماتقاطعوش سانطرال راه غاتهز قشها و تمشي فحالها ! هانتا درتيها و عا سنطرال جاوبوك قالو ليك ا سيدي دخل سوق راسك راك قودتيها علينا ! ماعندنا فين نمشيو !
للمشكلة عندنا انه مازال السياسيين ديالنا غادين بديك العقلية ديال ما قبل اختراع السترينغ ! و مازال يصحابهم بلي دوك الخطابات ديال ما قبل انهيار جدار برلين صالحين لدابا ! و الطامة الكبرى انه حتى الشركات الخاصة لي نورمالمو كاتلقا فيها ديبارتومو قدو قداش ديال الماركوتينغ و مسؤولين على التواصل ماكايعرفوش يتواصلو ! كايعيشو منفاصلين على الشعب لي عايشين معاه و كايصنعو ليه المنتوجات ديالهم !
راه كاينة واحد الحاجة كاتسمى la communication de crise ( تواصل الازمات)
خاص بالحالات لي كاتواجه فيهم الشركات ازمات ! شنو خاص نقول شنو مانقولش ! كيفاش نسمع ! كيفاش نجاوب !
شنو معنيتها انه ثلاتة من الشركات الكبار فالمغرب يفشلو فالتواصل مع المقاطعين اليوم ؟
و انه لي هضرو فيهم جاو يكحلوها عماوها ؟
واش ماكاينينش كفائات قادرة تتواصل مع الناس و تحل هاد الازمة ؟
راه هادي هي المناسبة باش هاد الشركات و حتى الحكومة تبدا تفكر شوية فاساليب التواصل ديالها و تعاود تشوفها ! حيت بان ليا لحد الساعة كلشي فشل في حل الازمة !
و الحل ديال الازمة اليوم ماشي هوا يطيح الثمن !
الحل كاين فالتواصل لي خاصو يكون مع المقاطعين !
راه لاكان تواصل ناجح هاد الازمة تقدر ديبلوكا.
وا فكرو مع راساتكم مزيان ! و حاولو تشركو معاكم اخصائيين فالتواصل قبل ماتزيدو تزبلوها اكثر ماهي مزبلة !
حيت بان ليا لحد الساعة لي كايدير يديه فالعصيدة ! كايخرج بحروق من الدرجة الثالتة !