ماشي من حق شي حد يتكرفص عليهم بالعصى، كيما ماشي من حق أي واحد هاز ميكرو يدوز تصريح يدعو فيه صاحبه لقتل هاد جوج ديال الناس وبالظبط رجمهم أي قتلهم بطرق القرون الوسطى، هادي براسها راه جريمة.

واحد الوقت كانو المغاربة فرحانين بإعلام بديل على الإعلام الرسمي، لي فيه غادي يسمعو خطابات ومعلومات وبرامج ومحتوى مكاينش فالإعلام الرسمي ، أو إعلام كولو العام زين كيما كانو كيسميوه، وبدا هادشي مع العهد الجديد والصحافة المستقلة لي صدقات مستقلة على جهة وتابعة لجهات، والمواقع الإلكترونية لي كتوصل صوت الشعب، الموشكيل ملي وصل هاد صوت الشعب صدق صوت مقود كثر من الإعلام الرسمي، غارق بالتذلل والمسكنة والدروشة والشكوة، وعامر بالقيم والأفكار المتشددة لي تقصف بيها خلال عقود بداها من الكاسيط مورورا بالفيسيدي وصولا لقنوات البترودولار بخبار موالين الوقت، والنتيجة هي ولينا نسمعو تصريحات متشددة تدعوا لقتل الآخر والتنكيل بيه، ومليوح داكشي فالأنترنيت وهانية بحال إلى حنا أفغانستان.
فألمانيا وفأغلب العالم الغربي كاين النازيون الجدد وحتى القدماء وعندهم الطرق باش كيوصلوا الصوت ديالهم، ولكن الدول لي فيها والشعب عارفين أن هاداك خطاب ديال الكراهية وكيعاقبوا أي منبر إعلامي كيدوز مثل هاد الخطاب، والأمر مكيتعلقش غير بالنازيين الجدد بل بأي واحد عندو خطاب كيدعي للعنف والكراهية فراه مكيدوزش فالإعلام سواء الرسمي أو المستقل، كتجي حتى لعندنا حنا وكتلقى المنافسة على أشدها في تدواز أي خطاب كيما كان فالمواقع، كولشي هاز ميكرو وكيتسابق على التصريحات وتصوير الوقائع وفي بعض الأحيان اختلاقها كاع، المهم هو البوز والحضور والمشاركة وإيصال صوت الشعب العامر بالحقد والكراهية والكبت والكذوب والعنف.
وشفنا مؤخرا تصريحات لمواقع صحفية في الحادثة ديال جمعة سحيم فيها دعوة صريحة للعنف والقتل والكراهية، ودازت للعلن وقرينا مئات التعليقات لي كتأيد هاد التصريحات، وتخلق نقاش كاع في حادثة لي ماخاصش يكون فيها نقاش، رباعة ديال الناس تكرفصو على مواطنين بالعصي ورعبوهم وسرقوهم من الفوق وصوروهم باش يشوهوهم، واش هاد الحادثة محتاجة نقاش فواش عندهم الصح أو لا، أو آش كانو كيديرو هادوك جوج تما، هادي جريمة وفق كاع القوانين والأعراف والأخلاق الجاري بيها العمل فكاع العالم المتحضر، كتجي حتى لهاد البلاد وكيولي النقاش حول آش كان كيدر راجل بنت فنهار رمضان تما، يكونوا كيديروا آش بغاو، ماشي من حق شي حد يتكرفص عليهم بالعصى، كيما ماشي من حق أي واحد هاز ميكرو يدوز تصريح يدعو فيه صاحبه لقتل هاد جوج ديال الناس وبالظبط رجمهم أي قتلهم بطرق القرون الوسطى، هادي براسها راه جريمة.