لمغاربة للي فموسكو ما مزيانينش. غير تأهلات روسيا وقلبوها مشجعين ليها وطبعا هاد الشي غير على قبل الشهبات

البارح فالليل وحتى صباح هاد النهار عدد من لمغاربة احتافلو فالساحة الحمراء فمنطقة اربات القريبة منها بتأهل المنتخب الروسي الى الدور الثاني كاول منتخب يصل الى هاد الدور فهاد المونديال 2018. المفروض يشجعو المنتخب المصري اللي خسر واخا بمحمد صلاح ب3 ل1 ولا غير يلتازمو الحياد ويسكتو٬ ولكن كيف عاينات “كود” البارح تقريبا غير رايات المغرب اللي خرجات فرحانة بالجو الاحتفالي لكبير للي عرفاتو موسكو.
طبعا كيف عاينت “كود” هاد الشي ما عندو علاقة بالكورة. لمغاربة بانو ليهم الروسيات الزوينات وهما يقلبوها تشجيع. شي باغي يهني شي باغي يتصور شي باغي يقيس شي باغي يدبر شي باغي يطلع السكرة وشي غير ضد فمصر “دابا باش تقصات مصر اليوم نكونو شوية مرتاحين مع البرتغال ايلى وقعات شي نتيجة مقودة. كنبردو على ريوسنا وصافي” يشرح احد المتفرجين ل”كود” سباب فرحتو.
البارح فهاد المدينة ما بانوش تقريبا المصريين. غبرو. حتى لعرب لخراين اللي مولفين كيبانو مرة مرة فالساحة الحمرا اختفو. طبعا حتى الروسيات كان اللي فيهم داير كاسكيطة مغربية وكاين اللي تصور مع الراية. كان جو النشاط وصافي