قيادي من الاحرار للبي جي دي عبر “كود”: واش انتوما لاباس غير خسرتو فالمضيق نضتو تغوتو وانتوما ديما كتسبونا ونزيدوكم انتوما اللي كتسيرو الحكومة وكونو قد لسانكم وتصرفو عوض ما تعطيوها للقرنابي

استغرب قيادي من حزب التجمع الوطني للاحرار في تصريح ل”كود” مما سماه توقيت الهجوم على حزبه من قبل قادة العدالة والتنمية اللي هما متحالفين معاها فالحكومة.
المصدر قال ل”كود” ماشي معقول نهار تهاجمنا العدالة والتنمية خاصنا نحدرو الراس ونهار جا تدخل رشيد الطالبي العلمي بالجامعة الصيفية لشبيبة الحزب فمراكش وذكر بخطورة النموذج التركي على المغرب واثار نقاط اخرى كثيرة ناضو شدو فهادي وبداو يسبو.
القيادي قال ل”كود” “كلشي عارف شحال من مرة جبدونا. شحال من مرة هاجمونا. اخرها عضو الامانة العامة لحزبهم عبد العزيز افتاتي اللي ما خلى ما قال علينا بعد ما ربحناهم فالانتخابات الجزئية السيمانا اللي فاتت بالمضيق لفنيدق”.
وقال المصدر ل”كود” ان حالة الهجوم ما هي إلا انعكاس طبيعي لهزيمة الحزب المذلة فهاد الانتخابات اللي كاينة تحت النفوذ الترابي لتنسيقية الشمال للأحرار والتي يعتبر الطالبي العلمي منسقا جهويا لها.
المصدر زاد ل”كود” باللي هاد الشي جا بتصريح افتاتي اللي تحدث عن الكارتيلات وسب حزبنا وما خلى فيه والو٬ هاديك الساعة ما ناض حتى حد منهم كيرد فيه على تصريحات عضو الامانة العامة للبي جي دي. واضاف المصدر ل”كود” ان خرجة سليمان العمراني نائب الامين العام للبي جي دي “أمر مدروس من طرف العدالة والتنمية لتصريف الأزمة والتخفيف من وطأ الزلزال الذي يعيشه الحزب منذ انتخابات الفنيدق، ولمحاولة رأب الصدع والحد من الإنقسام الداخلي”
المصدر اكد ل”كود” “حنا فالاحرار وقرناهم وما عمرنا سبيناهم وباش العلمي عبر على موقف خلاو كلمتو كلها وشدو غير فتركيا. هاد الشي يضيف المصدر ل”كود” بين ان ما عندهم ما يقدرو فالتعليم والشغل والمواضيع اللي كتهم لمغاربة” ثم اضاف “وانتوما اش من صفة كدافعو على اردوگان واش خاصهم يدافعو على لمغاربة
بخصوص ما ذهب اليه العمراني اللي قال خاص الاحرار يخرجو من الحكومة رد المصدر ل”كود” “شكون اللي فالحكومة شكون اللي كيسيرها. هما ايلى عندهم القرار ماشي حنا. على من كيضحكو. وكونو قد لسانكم وتصرفو عوض ما تعطيوها للقرنابي” يختم مصدر “كود”.