ها ما كَالت الشوافة: رضوان الفايد كان كايلبس النقاب و البرقع باش يتخبا

قال وكيل الجمهورية الفرنسي ان الشفار الهارب اللي تشد اليوم، رضوان الفايد، بعد 3 اشهر من الهرب من السجن، كان كايستعمل البرقع باش يتخبى وهو يتنقل مع عصابته.
وكيل الجمهورية فرانسوا مولان قال في ندوة صحفية قبل قليل ان المحققين كانو كايراقبو شي بلايص كايترددو عليها عناصر العصابة اللي سعدات الفايد و لاحظو امراة منقبة ديما كتستعمل سيارة خاصة و عرفو بلي راجل وخا هكاك من طريقة المشي و ف الرابعة صباحا اقتحمو المنزل اللي دخل ليه ولقاوه فعلا رضوان الفايد
كما تم اعتقال اخوه رشيد و بعض اولاد عمه و امرأة، للتذكير ف الفايد معروف بانه ملك الهروب من السجون ف فرنسا وهو من اصل جزائري ومعروف بسرقاته اللي كيخطط ليها مزيان وكان مشهور حتى انه تم استدعاءه ف التلفزيون عدة مرات و عندو كتاب كايعاود فيه على حياته و كان يعد نجم للشباب ذي الاصل المغاربي ، غير انه ف اخر سرقة ضاعت شهرته و التعاطف معه بسبب مقتل شرطية ف العملية ، وبعد الحكم عليه قدر يهرب من الحبس باستعمال هيلوكبتر اختطافوها افراد عصابته.
المعطى ديال انه كان كايتسعمل البرقع او النقاب ف التخفي غادي يزيد يزير ف فرنسا استعمال هاد اللباس الشرقي اللي تمنع فيها و ف بعض الدول الاوروبية غير ف السنوات الاخيرة ..