محاكمة غير مسبوقة لانفصاليي كاتالونيا. كلشي اسبانيا متبعها وكاين نقاش كبير ونقل مباشر للمحاكمة لقضية انفصال. علاش هاد الشي ما درناهش فمحاكمة الريف وعلاش ما نستافدوش منها فالصحرا

اللي فتح موقع شي جورنال اسباني دابا غادي يلقى نقل مباشر لمحاكمة “غير مسبوقة” او تاريخية” ل12 من قادة كاتالونيا اللي كيطالبو بالعلالي بالانفصال. القنوات متبعة الموضوع الاذاعات بدلات البرامج ديالها لهاد الحدث غير المسبوق.
المحاكمة تتم امام المحكمة العليا وذلك بسبب تنظيم هؤلاء لاستفتاء حول تقرير المصير منعه القضاء الإسباني.
هاد المحاكمة اللي غادية تستمر 3 اشهر٬ غايب عليها رئيس كاتالونيا السابق كارلس بيگديمونت للي هرب لبلجيكا ومن بعد لالمانيا. اسبانيا لا تحاكم غيابيا فمثل هاد التهم.
محاكمة يحضرها 600 صحافي من 150 وسيلة اعلام.
رئيس المحكمة العليا الاسبانية اعتبرها “أهم محاكمة ننظمها منذ إرساء الديمقراطية” في البلاد بعد وفاة الديكتاتور فرانشيسكو فرانكو عام 1975. فيما طلب الإدعاء بعقوبات تصل إلى السجن 25 عاما للمتهمين ال12 الذين كانوا عند الوقائع مسؤولين في حكومة المنطقة أو في برلمانها أو في المنظمتين الانفصاليتين اللتين تتمتعان بنفوذ كبير “الجمعية الوطنية الكاتالونية” (آ ان سي) و”أومنيوم كولتورال”.
سمعو مزيان. الادعاء اي النيابة العامة عندنا او الغراق طالبة 25 عام. واجيو تشوفو التهم بعدا “التمرد المشددة” و”اختلاس أموال” و”العصيان”.
هادو راهم نظمو فاكتوبر 2017 استفتاء لتقرير المصير ضدا على مدريد وتحداوها. بعدها كان رئيس الحكومة السابق راخوي اقال هاد الحكومة.
محامي المتهمين وصف المحاكمة بالسياسية وبالضييق على الحريات ومحاكمة للديموقراطية. فالقنوات نقل لهاد الشي ومناقشته من كل وجهات النظر.
كنقولو هاد الشي باش نهدرو على الريف ومحاكمة نشطاء الحراك. خرجو باحتجاجات اجتماعية بمطالب ثقافية احيانا اقتصادية اجتماعية. الانفصال تمش التعبير عنو مباشرة.
الدولة تفاعلات مع هاد المطالب واقرات باللي مشاريع منارة المتوسط بالحسيمة ما دارتش فوقتو ووقع الزلزال السياسي وطير وزراء من الحكومة ومع ذلك تضرب ناصر الزفزافي وغيرو ب20 عام. طبعا هاد الشي ما كانش فيه نقاش عمومي فالاعلام فالاذاعات. كان صوت واحد تقريبا.
من هاد المحاكمة فاسبانيا ممكن نتعلمو. نتعلمو النقاش والحوار. ما نخافوش منو. هاد الشي اللي خاصو يطبق اصلا فالصحرا. ما نقصيو لا الانفصالي لا اللي نص نص من النقاش. يحضر يعبر امام الوحدوي. الرابح اللي غادي يخرج هو المغرب القوي بحريته. هاد الحرية ما غادينش يلقاوها الانفصاليون لا فالبوليساريو لا فالجزائر.