البوليساريو مع انفصال كاتالونيا وما قادرينش يقولوها. انفصالي ل"كود": كلشي قادة الجبهة وناسها مع الانفصال وخايفين من اسبانيا

البوليساريو عايشة انفصال حقيقي هاد الايام فقضية انفصال كاتالونيا عن اسبانيا. ظاهريا ضربوها بالطم وفرضو على كل صحفهم ومواقعهم ما يجبدوش الموضوع ويبينو باللي هما مع الدولة الاسبانية لكن بيناتهم كيف ما عاينت "كود" بعض النقاشات مع "الانفصال". "هادا من حقهم والانفصال الى كمل وانا موافق عليه وكون كنت فكاتالونيا كون صوتت عليه٬ غادي يكون مثال فالصحرا" يقول انفصالي في حديثه مع صديق له.
شخص اخر يحمل جواز السفر الاسباني يدافع بحماسة غريبة عن فكرة الانفصال قال ل"كود" "ما تقدرش الجبهة ولا المنظمات ديالها ولا حتى الشخصيات المعروفة فيها تقول باللي حنا مع الانفصال حقاش خايفين من اسبانيا وخايفين اكثر من الشعب الاسباني". من الامثلة التي يقدمها هذا الانفصالي ل"كود" والذي يقول ان غالبية الانفصاليين مع انفصال كاتالونيا "خوذو مثلا جزر الكاناري فيها اكبر المدافعين على البوليساريو ولكن كلهم ضد الانفصال فكاتالونيا. ايلى خدا بداو الانفصاليون ديال البوليساريو يعبرو على موقفهم غاديين يخسرو اكبر حليف ليهم فاسبانيا".
المشكلة اللي واقعة لهاد الانفصاليين فالصحرا هو انهم عارفين ان هاد القضية كتاثر بشكل كبير على الصحرا ولهاد السبب كيدافعو كلهم على الانفصال بيناتهم من رئيسهم الى اخر المتعاطفين ولكن كلهم منافقين ولا خوافة ما قادرينش يقولو هاد الموقف