هاد الصبليون عزيز عليهم يتوضوها. فالوقت لي ملك اسبانيا جا للمغرب وعلاقات البلدين مزيانة بزاف صحيفة صبليونية باغيا تقودها: قاليك الملك محمد السادس غادي يتخلى على العرش وشبوقات كبيرة

younesfta@gmail.com
فالوقت لي ملكي إسبانيا، فيليبي السادس وليتيثيا، جاو دوزو يومين فالرباط وزادو قواو العلاقات بين المغرب وإسبانيا، وهضرات الصحافة الإسبانية على الموقف الزوين لي دارو محمد السادس مع ملكة إسبانيا، ملي عطاها سلهامو فاش جاها البرد، وعتابروه موقف نبيل من ملك جنتل مان، ناضت صحيفة “إكسترا كونفيدينسيال“، وبدات كتخربق حول الصحة ديال الملك.
الصحيفة هضرات على ولي العهد مولاي الحسن، وقالت أنهم كيوجدوه وكيحضروه فالملتقيات لكبيرة بسباب صحة الملك، وهادشي طبعا تخربيقة كبيرة، حقاش بالرجوع للتاريخ غانعرفو أن الحسن الثاني كان كيحضر صغير مع محمد الخامس للملتقيات الدولية، وكذلك المثال بالنسبة لمحمد السادس لي كان كيحضر ملتقيات كبيرة مع الحسن الثاني، لأن هذا عرف عند العائلة الملكية المغربية أن ولي العهد من صغرو خاصو ينخارط فالحياة السياسية والعلاقات الدولية.
الصحيفة خربقات كولشي وبدات تبني مواقفها على التلصاق. حضور ولي العهد لسبعينية إنتهاء الحرب العالمية ففرنسا، وحضورو فإستقبال ملكي إسبانيا بمرض محمد السادس، وهادشي كيجي فالوقت لي العلاقات بين المغرب وإسبانيا ماشية مزيان، وكاين على ما يبدو لي باغي يشوش عليها بهاد التخربيق، لأن الصحيفة ماهضراتش على هادشي إلا بعد إنتهاء الزيارة والصدى الجميل لي خلاتو في إسبانيا والمغرب، وكاين لي ماعجبهومش الحال أن إسبانيا والمغرب يكونو سمن على عسل.